Astana qalasy Politsiia departamentine qarasty Esil aýdany politsiia basqarmasy qyzmetkerleri arasyndaǵy janjalǵa qatysty sot úkimi shyqty. Bul týraly jýrnalist Mihail Kozachkov málimdedi, dep habarlaidy Dalanews.kz.
Sot materialdaryna sáikes, 32 jastaǵy Áli Ábetaev buryn ýchaskelik inspektor bolyp qyzmet atqarǵan. Keiin ol Esil aýdany politsiia basqarmasynyń jergilikti politsiia qyzmeti bóliminde bastyqtyń orynbasary laýazymyna taǵaiyndalǵan.
Oqiǵa byltyr maýsym aiynda bolǵan. Sol kúni Ábetaev politsiia bóliminde kezekshi bolyp qyzmet atqarǵan. Al onyń tikelei basshysy Sáken Noǵaev ýchaskelik inspektorlarmen birge qaladaǵy meiramhanalardy tekserý reidine shyqqan.
"Tekserý barysynda politseiler "Tanýki" meiramhanasynda kelýshilerge kalian usynylǵanyn anyqtaǵan. Sáken Noǵaev keiinirek túsiniktemesinde qyzmetkerler ákimshilik hattama toltyryp jatqan kezde Ábetaev pen olardyń ortaq basshysy Aidos Mombiev telefon arqyly habarlasyp, meiramhanadan ketýdi talap etkenin aitqan. Degenmen sol sátte politseiler zańbuzýshylyq boiynsha aiyppul rásimdep úlgergen", - deidi jýrnalist.
Kozachkovtyń málimetinshe, keiin Noǵaev "Berezka" meiramhanasyna barǵan. Alaida onyń qaramaǵyndaǵy qyzmetkerler Aidos Mombievtiń ashýyna qalamyz dep qorqyp, ishke kirýden bas tartqan. Sol kezde Ábetaev Noǵaevqa birneshe ret qońyraý shalǵanymen, Noǵaev telefon aqaýyna bailanysty jaýap bere almaǵan.
"Keiin Ábetaev áriptesteri arqyly Noǵaevpen bailanysyp, ony "Meat&Bear" meiramhanasynyń janyna kelýge shaqyrǵan. Kezdesý barysynda Ábetaev Noǵaevtan nege qońyraýlarǵa jaýap bermegenin surai bastaǵan. Sóz arasynda janjal týyndap, bastyqtyń orynbasary óz jetekshisine qol kóterip, ony uryp-soqqan. Tipti tunshyqtyrý ádisin qoldanǵany aityldy. Osydan keiin Sáken Noǵaev meditsinalyq kómekke júginip, politsiiaǵa aryz túsirgen", - deidi ol.
Tergeý barysynda oqiǵaǵa qatysy bar barlyq tulǵa, sonyń ishinde Aidos Mombiev te jaýap bergen. Ol tergeý kezinde eshqandai zańsyz buiryq bermegenin, meiramhanalardy "qorǵashtaý" týraly áńgime shyndyqqa janaspaitynyn aitqan. Onyń sózinshe, Noǵaevtan tek qyzmettik esepti ortaq chatqa jibermegeni úshin habarlasqan.
Bastapqyda Áli Ábetaevqa qyzmettik ókilettigin asyra paidalandy degen aiyp taǵylǵan. Alaida sotta prokýratýra aiyptyń biliktiligin ózgertip, jeńil dene jaraqatyn keltirý baby boiynsha qaraýdy suraǵan. Sot bul usynyspen kelisip, burynǵy politsiia kapitanyn bir jyl merzimge bostandyǵyn shekteý jazasyna kesti.
Aita keteiik, sot úkimi áli zańdy kúshine engen joq.
