Elordada erekshe bilim berý qajettilikteri bar balalarǵa arnalǵan inkliýzivti bilim berý keńistigi jyl saiyn keńeiip keledi. Qazirgi tańda Astana qalasynda 4 psihologiialyq-pedagogikalyq túzetý kabineti, 2 ońaltý ortalyǵy jáne aýtizm spektrindegi balalardy qoldaý maqsatynda 2 arnaiy ortalyq jumys isteidi,- dep habarlaidy Dalanews.kz
Jyl saiyn bul mekemelerde 4 000-nan astam bala keshendi túzetý kómegin alady.
Inkliýzivti baǵyttaǵy jumysty odan ári kúsheitý maqsatynda 2025 jyldyń sáýir aiynda elordada №5 psihologiialyq-pedagogikalyq túzetý ortalyǵy óz jumysyn bastady. Bul ortalyq 0 jastan 18 jasqa deiingi erekshe bilim berý qajettilikteri bar balalarǵa arnalǵan. Atap aitqanda, mektepke deiingi uiymdarǵa barmaityn, arnaiy nemese jalpy bilimmen qamtylmaǵan balalarǵa jan-jaqty kómek kórsetiledi.
№5 ortalyq psihologiialyq-meditsinalyq-pedagogikalyq konsýltatsiia (PMPK) qorytyndysy negizinde kelesi sanattaǵy balalarmen jumys júrgizedi:
• kórý jáne estý qabileti buzylǵan;
• sóileý qabileti damymaǵan nemese tejelgen;
• tirek-qimyl júiesinde aqaýy bar;
• psihikalyq damýy kesheýildegen;
• aqyl-oiynda aýytqýy bar;
• minez-qulqy men emotsiialyq-eriktik salada qiyndyqtary bar balalar.
Ortalyqtyń jobalyq qýaty — 100–150 bala, al jyl saiynǵy qamtylý kólemi — 300–350 bala. Munda 9 mamandandyrylǵan kabinet jumys isteidi. Balalarmen logopedter, defektologtar, psihologtar, beiimdelgen dene shynyqtyrý (AFK) mamandary, mýzykalyq yrǵaq nusqaýshylary, sýrdopedagog pen tiflopedagogtar jumys isteidi.
