ەلوردادا ەرەكشە ءبىلىم بەرۋ قاجەتتىلىكتەرى بار بالالارعا ارنالعان ينكليۋزيۆتى ءبىلىم بەرۋ كەڭىستىگى جىل سايىن كەڭەيىپ كەلەدى. قازىرگى تاڭدا استانا قالاسىندا 4 پسيحولوگيالىق-پەداگوگيكالىق تۇزەتۋ كابينەتى، 2 وڭالتۋ ورتالىعى جانە اۋتيزم سپەكترىندەگى بالالاردى قولداۋ ماقساتىندا 2 ارنايى ورتالىق جۇمىس ىستەيدى،- دەپ حابارلايدى Dalanews.kz
جىل سايىن بۇل مەكەمەلەردە 4 000-نان استام بالا كەشەندى تۇزەتۋ كومەگىن الادى.
ينكليۋزيۆتى باعىتتاعى جۇمىستى ودان ءارى كۇشەيتۋ ماقساتىندا 2025 جىلدىڭ ءساۋىر ايىندا ەلوردادا №5 پسيحولوگيالىق-پەداگوگيكالىق تۇزەتۋ ورتالىعى ءوز جۇمىسىن باستادى. بۇل ورتالىق 0 جاستان 18 جاسقا دەيىنگى ەرەكشە ءبىلىم بەرۋ قاجەتتىلىكتەرى بار بالالارعا ارنالعان. اتاپ ايتقاندا، مەكتەپكە دەيىنگى ۇيىمدارعا بارمايتىن، ارنايى نەمەسە جالپى بىلىممەن قامتىلماعان بالالارعا جان-جاقتى كومەك كورسەتىلەدى.
№5 ورتالىق پسيحولوگيالىق-مەديسينالىق-پەداگوگيكالىق كونسۋلتاسيا (پمپك) قورىتىندىسى نەگىزىندە كەلەسى ساناتتاعى بالالارمەن جۇمىس جۇرگىزەدى:
• كورۋ جانە ەستۋ قابىلەتى بۇزىلعان؛
• سويلەۋ قابىلەتى دامىماعان نەمەسە تەجەلگەن؛
• تىرەك-قيمىل جۇيەسىندە اقاۋى بار؛
• پسيحيكالىق دامۋى كەشەۋىلدەگەن؛
• اقىل-ويىندا اۋىتقۋى بار؛
• مىنەز-قۇلقى مەن ەموسيالىق-ەرىكتىك سالادا قيىندىقتارى بار بالالار.
ورتالىقتىڭ جوبالىق قۋاتى — 100–150 بالا، ال جىل سايىنعى قامتىلۋ كولەمى — 300–350 بالا. مۇندا 9 مامانداندىرىلعان كابينەت جۇمىس ىستەيدى. بالالارمەن لوگوپەدتەر، دەفەكتولوگتار، پسيحولوگتار، بەيىمدەلگەن دەنە شىنىقتىرۋ (افك) ماماندارى، مۋزىكالىق ىرعاق نۇسقاۋشىلارى، سۋردوپەداگوگ پەن تيفلوپەداگوگتار جۇمىس ىستەيدى.
