Elordada «Baqytty shańyraq» qoǵamdyq qory erekshe balalar jáne olardyń otbasylaryna arnalǵan oqý-ońaltý ortalyǵyn ashty,- dep habarlaidy Dalanews.kz
Jańa ortalyqtyń ashylý saltanatyna Astana qalasy Ishki saiasat basqarmasynyń basshysy Nurdáýlet Álmuhanov, Áielder isteri jáne otbasy jónindegi komissiia músheleri Baian Toikebaeva, Natalia Semenenko jáne t.b. qatysty.
Astana qalasy Ishki saiasat basqarmasynyń basshysy Nurdáýlet Álmuhanov alǵashqy quttyqtaý sóz sóilep, ortalyqtyń ashylý rásimin jasap, lentasyn qidy.
Qonaqtar ǵimrattyń ishin aralap, qos bólimniń jumysymen tanysty. Ortalyqta balalarǵa jáne eresekterge arnalǵan eki bólim bar. Birinde kóbine ońaltýǵa kóńil bólinse, birinde oqýǵa nazar aýdarylady. Atalǵan ortalyqqa qor qanatynyń astyndaǵy erekshe balalar ǵana emes, olardyń baýyrlary men ata-analary da kelip, tegin em alyp, kýrsqa qatysyp, paidaly ispen shuǵyldana alady.
Munda oiyn jáne saýyqtyrý jattyǵýlary, massaj jasalady. Sondai-aq mýzyka, sýret kórmeleri jáne tigin bólmesi men arnaiy ashana da bar.
«Baqytty shańyraq» qoǵamdyq qorynyń tóraiymy Botagóz Sultanovanyń aitýynsha, bul qorǵa qarasty ekinshi ortalyq. Alǵashqysy R.Qoshqarbaev dańǵyly boiynda ornalasa, bul joly Y.Dúkenuly kóshesinde ashyldy.
Aita keteiik, qorǵa qarasty 1092 otbasy, 2876 bala jáne 1180 erekshe bala bar. Atalǵan ortalyq demalyssyz jumys isteidi.
