Meditsina qyzmetkerleri kúni qarsańynda Astanada elimizdiń densaýlyq saqtaý salasynyń úzdik ókilderin memlekettik jáne salalyq marapattarmen marapattaý rásimi ótti,- dep habarlaidy Dalanews.kz
Jalpy 68 meditsina salasynyń qyzmetkeri «Barys», «Parasat», «Dostyq», «Qurmet» ordenderimen, sondai-aq «Eren eńbegi úshin», «Shapaǵat» medaldarymen marapattaldy.
Sondai-aq, is-shara barysynda «Kásibiniń úzdigi» respýblikalyq baiqaýynyń jeńimpazdary anyqtaldy. Dárigerler, medbikeler, farmatsevter jáne densaýlyq saqtaý júiesiniń basqa da mamandary kásibi sheberligi, janqiiarlyǵy men mamandyǵyna adaldyǵy úshin marapattaldy.
Saltanatty sharaǵa qatysýshylarǵa Qazaqstan Respýblikasy Premer-Ministriniń orynbasary Ermek Qosherbaev pen Densaýlyq saqtaý ministri Aqmaral Álnazarova quttyqtaý sóz sóiledi.
«Búgin biz Qazaqstannyń densaýlyq saqtaý júiesiniń eń tańdaýly ókilderin – «Kásibiniń úzdigi» baiqaýynyń jeńimpazdaryn marapattap otyrmyz. Bul jandar kún saiyn adam ómirin qutqaryp, densaýlyǵyn qalpyna keltirip, joǵary kásibilikti jáne óz isine adaldyqty kórsetip júr. Barsha jeńimpazdardy shyn júrekten quttyqtai otyryp, halyqqa kórsetken qyzmetteri úshin árqaisyńyzǵa alǵysymdy bildiremin», – dedi Ermek Qosherbaev.
Búgingi tańda elimizdiń densaýlyq saqtaý júiesinde 378 myńnan astam adam eńbek etedi. Onyń ishinde 271 myńnan astamy – meditsina qyzmetkerleri, shamamen 81 myń dáriger men 190 myń orta býyn mamandary bar. Budan bólek, salanyń eńbek ujymy quramynda kishi meditsinalyq personal, menedjerler, áleýmettik qyzmetkerler, injenerler jáne basqa da mamandar bar.
Densaýlyq saqtaý ministri Aqmaral Álnazarova memleket meditsina mamandyǵynyń tartymdylyǵyn arttyryp, kásibi ortany qolaily etýge júieli túrde kúsh salyp jatqanyn atap ótti.
– Biylǵy jyldyń bes aiynda densaýlyq saqtaý mamandary 1,4 millionǵa jýyq naýqasqa statsionarlyq kómek kórsetti, onyń ishinde 399 myńnan astamy – balalar. 445 myńnan astam ota jasalyp, sonyń ishinde 8,4 myńnan astamy – joǵary tehnologiialy operatsiialar. 80 myńnan astam naýqas ońaltý kýrsynan ótti, al ambýlatoriialyq-emhanalyq jaǵdaida 3 millionnan astam ońaltý qyzmeti kórsetildi. 2025 jyldyń basynan bastap emhanalarda 163 millionnan astam adam qabyldandy, jedel járdem qyzmeti 2,7 millionnan astam shaqyrtýǵa bardy. Akýsherler 132 myńǵa jýyq anany bosandyrdy, – dedi ministr.
Prezident Qasym-Jomart Toqaev meditsina qyzmetkerleriniń qoǵamdaǵy róli men mártebesiniń mańyzdylyǵyn únemi atap ótedi. 2024 jyly Memleket basshysy meditsina qyzmetkerleriniń áleýmettik mártebesi men quqyqtyq qorǵalýyn arttyrýǵa baǵyttalǵan zańǵa qol qoidy.
Kásibi saqtandyrý júiesi engizildi. Sonymen qatar, aýyldyq jerlerge kadr tartý jumystary jalǵasyp jatyr: 2023 jyldan bastap aýylǵa tapshylyǵy joǵary mamandyqtar boiynsha kelgen dárigerlerge 100 AEK (shamamen 8,5 mln teńge) kóleminde bir rettik tólem, turǵyn úige jeńildetilgen nesie, kóterilý járdemaqysy jáne jalaqysyna ústeme aqy qarastyrylǵan.
Saladaǵy úzdik mamandardy marapattaý – meditsina qyzmetkeriniń joǵary missiiasyn, iaǵni ult saýlyǵynyń kúzetinde turý, úmit pen ómirdi saqtap qalý jolyndaǵy erligin eske salar mańyzdy sát. Bul mereke – tek mamandyqtyń ǵana emes, aq halatty abzal jandardyń erligi men janashyrlyǵyna kórsetilgen zor qurmet.
