مەديسينا قىزمەتكەرلەرى كۇنى قارساڭىندا استانادا ەلىمىزدىڭ دەنساۋلىق ساقتاۋ سالاسىنىڭ ۇزدىك وكىلدەرىن مەملەكەتتىك جانە سالالىق ماراپاتتارمەن ماراپاتتاۋ ءراسىمى ءوتتءى،- دەپ حابارلايدى Dalanews.kz
جالپى 68 مەديسينا سالاسىنىڭ قىزمەتكەرى «بارىس»، «پاراسات»، «دوستىق»، «قۇرمەت» وردەندەرىمەن، سونداي-اق «ەرەن ەڭبەگى ءۇشىن»، «شاپاعات» مەدالدارىمەن ماراپاتتالدى.
سونداي-اق، ءىس-شارا بارىسىندا «كاسىبىنىڭ ۇزدىگى» رەسپۋبليكالىق بايقاۋىنىڭ جەڭىمپازدارى انىقتالدى. دارىگەرلەر، مەدبيكەلەر، فارماسيەۆتەر جانە دەنساۋلىق ساقتاۋ جۇيەسىنىڭ باسقا دا ماماندارى كاسىبي شەبەرلىگى، جانقيارلىعى مەن ماماندىعىنا ادالدىعى ءۇشىن ماراپاتتالدى.
سالتاناتتى شاراعا قاتىسۋشىلارعا قازاقستان رەسپۋبليكاسى پرەمەر-مينيسترىنىڭ ورىنباسارى ەرمەك قوشەربايەۆ پەن دەنساۋلىق ساقتاۋ ءمينيسترى اقمارال ءالنازاروۆا قۇتتىقتاۋ ءسوز سويلەدى.
«بۇگىن ءبىز قازاقستاننىڭ دەنساۋلىق ساقتاۋ جۇيەسىنىڭ ەڭ تاڭداۋلى وكىلدەرىن – «كاسىبىنىڭ ۇزدىگى» بايقاۋىنىڭ جەڭىمپازدارىن ماراپاتتاپ وتىرمىز. بۇل جاندار كۇن سايىن ادام ءومىرىن قۇتقارىپ، دەنساۋلىعىن قالپىنا كەلتىرىپ، جوعارى كاسىبيلىكتى جانە ءوز ىسىنە ادالدىقتى كورسەتىپ ءجۇر. بارشا جەڭىمپازداردى شىن جۇرەكتەن قۇتتىقتاي وتىرىپ، حالىققا كورسەتكەن قىزمەتتەرى ءۇشىن ءارقايسىڭىزعا العىسىمدى بىلدىرەمىن»، – دەدى ەرمەك قوشەربايەۆ.
بۇگىنگى تاڭدا ەلىمىزدىڭ دەنساۋلىق ساقتاۋ جۇيەسىندە 378 مىڭنان استام ادام ەڭبەك ەتەدى. ونىڭ ىشىندە 271 مىڭنان استامى – مەديسينا قىزمەتكەرلەرى، شامامەن 81 مىڭ دارىگەر مەن 190 مىڭ ورتا بۋىن ماماندارى بار. بۇدان بولەك، سالانىڭ ەڭبەك ۇجىمى قۇرامىندا كىشى مەديسينالىق پەرسونال، مەنەدجەرلەر، الەۋمەتتىك قىزمەتكەرلەر، ينجەنەرلەر جانە باسقا دا ماماندار بار.
دەنساۋلىق ساقتاۋ ءمينيسترى اقمارال ءالنازاروۆا مەملەكەت مەديسينا ماماندىعىنىڭ تارتىمدىلىعىن ارتتىرىپ، كاسىبي ورتانى قولايلى ەتۋگە جۇيەلى تۇردە كۇش سالىپ جاتقانىن اتاپ ءوتتى.
– بيىلعى جىلدىڭ بەس ايىندا دەنساۋلىق ساقتاۋ ماماندارى 1،4 ميلليونعا جۋىق ناۋقاسقا ستاسيونارلىق كومەك كورسەتتى، ونىڭ ىشىندە 399 مىڭنان استامى – بالالار. 445 مىڭنان استام وتا جاسالىپ، سونىڭ ىشىندە 8،4 مىڭنان استامى – جوعارى تەحنولوگيالى وپەراسيالار. 80 مىڭنان استام ناۋقاس وڭالتۋ كۋرسىنان ءوتتى، ال امبۋلاتوريالىق-ەمحانالىق جاعدايدا 3 ميلليوننان استام وڭالتۋ قىزمەتى كورسەتىلدى. 2025 جىلدىڭ باسىنان باستاپ ەمحانالاردا 163 ميلليوننان استام ادام قابىلداندى، جەدەل جاردەم قىزمەتى 2،7 ميلليوننان استام شاقىرتۋعا باردى. اكۋشەرلەر 132 مىڭعا جۋىق انانى بوساندىردى، – دەدى مينيستر.
پرەزيدەنت قاسىم-جومارت توقايەۆ مەديسينا قىزمەتكەرلەرىنىڭ قوعامداعى ءرولى مەن مارتەبەسىنىڭ ماڭىزدىلىعىن ۇنەمى اتاپ وتەدى. 2024 جىلى مەملەكەت باسشىسى مەديسينا قىزمەتكەرلەرىنىڭ الەۋمەتتىك مارتەبەسى مەن قۇقىقتىق قورعالۋىن ارتتىرۋعا باعىتتالعان زاڭعا قول قويدى.
كاسىبي ساقتاندىرۋ جۇيەسى ەنگىزىلدى. سونىمەن قاتار، اۋىلدىق جەرلەرگە كادر تارتۋ جۇمىستارى جالعاسىپ جاتىر: 2023 جىلدان باستاپ اۋىلعا تاپشىلىعى جوعارى ماماندىقتار بويىنشا كەلگەن دارىگەرلەرگە 100 اەك (شامامەن 8،5 ملن تەڭگە) كولەمىندە ءبىر رەتتىك تولەم، تۇرعىن ۇيگە جەڭىلدەتىلگەن نەسيە، كوتەرىلۋ جاردەماقىسى جانە جالاقىسىنا ۇستەمە اقى قاراستىرىلعان.
سالاداعى ۇزدىك مامانداردى ماراپاتتاۋ – مەديسينا قىزمەتكەرىنىڭ جوعارى ميسسياسىن، ياعني ۇلت ساۋلىعىنىڭ كۇزەتىندە تۇرۋ، ءۇمىت پەن ءومىردى ساقتاپ قالۋ جولىنداعى ەرلىگىن ەسكە سالار ماڭىزدى ءسات. بۇل مەرەكە – تەك ماماندىقتىڭ عانا ەمەس، اق حالاتتى ابزال جانداردىڭ ەرلىگى مەن جاناشىرلىعىنا كورسەتىلگەن زور قۇرمەت.
