Elordada Dostyq úiinde halyq kompozitory, qazaqtyń dáýlesker kúishisi Dina Nurpeiisovanyń shyǵarmashylyǵyna arnalǵan «Ǵasyr sańlaǵy» kitaby tanystyryldy, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
Kitapta Dina Nurpeiisovanyń 20-ǵa jýyq klassikalyq avtorlyq áýenderiniń tarihi-mýzykalyq sipattamasy qamtylǵan. Buryn jariialanbaǵan muraǵattyq derekter negizge alyndy.
Kitaptyń avtory – qoǵam qairatkeri, pedagogika ǵylymdarynyń kandidaty, professor jáne Dina Nurpeiisovanyń urpaǵy Tólegen Qýanyshev. Shyǵarma qazaq mádenietine qyzyǵýshylyq tanytatyn ulttyq óner súier qaýymǵa arnalǵan. Týyndyny jaryqqa shyǵarý alty aiǵa sozylǵan.
– Aldymen dáýlesker kúishiniń úi muraǵatyndaǵy barlyq materialdaryna taldaý jasadym. Sodan keiin ol kitaphana qorlaryna, sonyń ishinde Máskeý kitaphanasyna, Lenin jáne Tashkent pedagogikalyq kitaphanasyndaǵy qundy málimetterdi saralap shyǵýǵa týra keledi. Bul derekkózderdiń barlyǵy meniń jumysymnyń negizi boldy. Keiinirek Almatydan kelgen áriptester QR-kodty kitapqa qosýdy usyndy, ol arqyly Dinanyń tanymal kúishilerdiń oryndaýyndaǵy shyǵarmalaryn tyńdaýǵa bolady. Bul kitap debiýt emes. Jańa basylym buryn jariialanbaǵan materialdarmen tolyqtyrylǵan. Aqparat jinaýǵa Qazaq Óner ýniversitetiniń oqytýshylary kómektesti, – deidi týyndy avtory.
Ótken jyly Dina Nurpeiisovanyń bai murasyna arnalǵan «Astana kúi qanatynda» atty qalalyq kúi festivali uiymdastyrylǵan bolatyn. Biyl sol dástúr jalǵasyn taýyn kúishiniń ómiri men shyǵarmashylyǵynan syr shertetin kitaptyń Astana tórinde tusaýynyń kesilýi jaidan-jai emes.
Dostyq úiinde kúishi músininiń resmi ashylýy ótti, aldaǵy ýaqytta murajaidyń jeke jádigerlerimen tanystyrylýy ótedi dep kútilýde.
