Astanada elimizdiń óńirlerinen kelgen taýar óndirýshilerdiń qatysýymen aýyl sharýashylyǵy jármeńkeleri bastalady. Olar 26 qazanǵa deiin ár senbi jáne jeksenbi kúnderi ótedi,- dep habarlaidy Dalanews.kz
Aldaǵy demalys kúnderi, iaǵni 30-31 tamyzda alǵashqy aýyl sharýashylyǵy jármeńkesi Túrkistan oblysynyń taýar óndirýshileriniń qatysýymen ótedi. Fermerler elorda turǵyndary men qonaqtaryna et, balyq, sút ónimderi, bakaleia, kókónis pen jemis-jidekterdi tikelei óndirýshiden usynady. Bul shara azyq-túliktiń qoljetimdiligin arttyrýǵa jáne otandyq kásipkerlerdi qoldaýǵa yqpal etedi.
Atap aitqanda, Túrkistan oblysynyń aýyl sharýashylyǵy taýar óndirýshileri Astanaǵa 600 tonnadan astam ónim jetkizedi. Onyń ishinde: 200 tonna kókónis, 100 tonna et jáne et ónimderi, 100 tonna sút ónimderi, 80 tonna baqsha daqyldary, 50 tonna jemis, 19 tonna balyq, 12 myń dana jumyrtqa jáne 60 tonnadan astam basqa da azyq-túlik bar.
Jármeńke aiasynda kontserttik baǵdarlama uiymdastyrylady.
Ótetin orny: «Qazanat» ippodromynyń avtoturaǵy, mekenjaiy – Qarqaraly tas joly, 1. Jármeńke kúnderi turǵyndar men qonaqtardyń yńǵaily kelýi úshin №18, №37 jáne №303 avtobýs baǵyttary qatynaidy.
Jármeńkeniń jumys ýaqyty – saǵat 9:00-den 18:00-ge deiin.
