Astanany aq ulpa basty, qar tańerteńnen beri úzdiksiz jaýyp jatyr. Jaýyn shashynnyń kóp túsýine bailanysty qalanyń kommýnaldyq qyzmetteri táýlik boiy kúsheitilgen rejimde jumys isteidi, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
11 qarashada elorda boiynsha qar tazalaý jumystaryna 1,3 myńnan astam arnaiy tehnika men 2,4 myńnan astam jol jumysshysy jumyldyryldy.
Erejege sáikes, eń aldymen joldarda keptelis bolmas úshin óte qarqyndy qozǵalys aimaqtary tazartylady. Sondai-aq ortasha qarqyndylyǵy bar ýchaskeler-alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. oryndar qardan tazartylady.
10 qarashadan 11 qarashaǵa qaraǵan túni qaladan poligondarǵa 20 myń tekshe metrden astam qar, 2 096 aýyr júk reisi shyǵaryldy.
Qar jaýa bastaǵannan beri Astanada bir apta ishinde 57 myń tekshe metrden astam qar shyǵaryldy, bul 4595 júk reisine teń.
