Qazaqstan Respýblikasynyń Ulttyq arhivinde qazaqstandyq maidangerler týraly málimetterdi qamtityn «Batyrlarǵa taǵzym» portalynyń tanystyrylymy jáne qujattyq kórme ótti,- dep habarlaidy Dalanews.kz
QR Mádeniet jáne aqparat ministrligi iske qosqan «Batyrlarǵa taǵzym» (https://batyrlarga-tagzym.kz) saitynda qazirdiń ózinde 678 331 ardager, onyń ishinde 365 Keńes odaǵynyń batyry, 4 eki márte Keńes odaǵynyń batyry jáne 19 «Dańq» ordeniniń kavaleri jáne basqa da erjúrek jaýyngerler týraly keń kólemdi málimetter bazasy men galereiasy bar.
Portalǵa kún saiyn 100-den asa ótinim kelip túsýde. Sońǵy 2 kúndegi esep boiynsha, veb-portalǵa ardagerlerdiń tizimin engizý boiynsha Astana, Almaty qalalary, Aqmola, Shyǵys Qazaqstan, Túrkistan, Atyraý oblystarynan ótinimder belsendi túsken.
Interfeis qajetti aqparatty tabýǵa ǵana emes, sonymen qatar óz ardager týystary týraly derekterdi qosýǵa, jańalyqtarmen tanysýǵa múmkindik beredi. Aita keterligi, portalǵa jiberilgen málimetter arhiv mamandarynyń arnaiy baqylaýynan soń qoldanysqa enedi.
Biregei jobaǵa birneshe elden de qyzyǵýshylyq artyp, usynystar túsýde. Atap aitsaq, Resei, Ázerbaijan, Belorýs, Moldova, Qyrǵyzstan, Ózbekstan, Túrikmenstan jáne Ýkrainadan 80-ge jýyq ótinim keldi.
Is-shara aiasynda «Batyrlarǵa taǵzym» saityndaǵy ardagerlerdiń, sondai-aq Qazaqstan Respýblikasy Ulttyq arhiviniń qorynan alynǵan Uly Otan soǵysynyń ardagerleri Kári Abitov, Táńirbergen Qalihanov, Hamit Erǵaliev, Málik Ǵabdýllin, Ermekqali Serikbaevtyń jeke qujattary men maidannan jazǵan hattary, jalpy 150-ge jýyq qundy derek jurtshylyq nazaryna usynyldy.
Is-sharaǵa UOS ardagerleriniń urpaqtary, memleket jáne qoǵam qairatkerleri, ziialy qaýym ókilderi, stýdentter men oqýshylar qatysty.
