قازاقستان رەسپۋبليكاسىنىڭ ۇلتتىق ارحيۆىندە قازاقستاندىق مايدانگەرلەر تۋرالى مالىمەتتەردى قامتيتىن «باتىرلارعا تاعزىم» پورتالىنىڭ تانىستىرىلىمى جانە قۇجاتتىق كورمە ءوتتى،- دەپ حابارلايدى Dalanews.kz
ق ر مادەنيەت جانە اقپارات مينيسترلىگى ىسكە قوسقان «باتىرلارعا تاعزىم» (https://batyrlarga-tagzym.kz) سايتىندا ءقازىردىڭ وزىندە 678 331 ارداگەر، ونىڭ ىشىندە 365 كەڭەس وداعىنىڭ باتىرى، 4 ەكى مارتە كەڭەس وداعىنىڭ باتىرى جانە 19 «داڭق» وردەنىنىڭ كاۆالەرى جانە باسقا دا ەرجۇرەك جاۋىنگەرلەر تۋرالى كەڭ كولەمدى مالىمەتتەر بازاسى مەن گالەرەياسى بار.
پورتالعا كۇن سايىن 100-دەن اسا ءوتىنىم كەلىپ تۇسۋدە. سوڭعى 2 كۇندەگى ەسەپ بويىنشا، ۆەب-پورتالعا ارداگەرلەردىڭ ءتىزىمىن ەنگىزۋ بويىنشا استانا، الماتى قالالارى، اقمولا، شىعىس قازاقستان، تۇركىستان، اتىراۋ وبلىستارىنان وتىنىمدەر بەلسەندى تۇسكەن.
ينتەرفەيس قاجەتتى اقپاراتتى تابۋعا عانا ەمەس، سونىمەن قاتار ءوز ارداگەر تۋىستارى تۋرالى دەرەكتەردى قوسۋعا، جاڭالىقتارمەن تانىسۋعا مۇمكىندىك بەرەدى. ايتا كەتەرلىگى، پورتالعا جىبەرىلگەن مالىمەتتەر ارحيۆ ماماندارىنىڭ ارنايى باقىلاۋىنان سوڭ قولدانىسقا ەنەدى.
بىرەگەي جوباعا بىرنەشە ەلدەن دە قىزىعۋشىلىق ارتىپ، ۇسىنىستار تۇسۋدە. اتاپ ايتساق، رەسەي، ازەربايجان، بەلورۋس، مولدوۆا، قىرعىزستان، وزبەكستان، تۇرىكمەنستان جانە ۋكراينادان 80-گە جۋىق ءوتىنىم كەلدى.
ءىس-شارا اياسىندا «باتىرلارعا تاعزىم» سايتىنداعى ارداگەرلەردىڭ، سونداي-اق قازاقستان رەسپۋبليكاسى ۇلتتىق ءارحيۆىنىڭ قورىنان الىنعان ۇلى وتان سوعىسىنىڭ ارداگەرلەرى كاري ابيتوۆ، تاڭىربەرگەن قاليحانوۆ، حاميت ەرعالييەۆ، مالىك عابدۋللين، ەرمەكقالي سەرىكبايەۆتىڭ جەكە قۇجاتتارى مەن مايداننان جازعان حاتتارى، جالپى 150-گە جۋىق قۇندى دەرەك جۇرتشىلىق نازارىنا ۇسىنىلدى.
ءىس-شاراعا ۇوس ارداگەرلەرىنىڭ ۇرپاقتارى، مەملەكەت جانە قوعام قايراتكەرلەرى، زيالى قاۋىم وكىلدەرى، ستۋدەنتتەر مەن وقۋشىلار قاتىستى.
