Astanada balasyn balabaqsha, mektepke aparatyn ata-analar jumysqa keshirek kele alady, dep habarlaidy Dalanews.kz.
Memlekettik eńbek inspektsiiasy komitetiniń tóraǵasy Erbolat Ábilhatin jańa jumys kestesiniń tiimdiligi jónindegi suraqqa jaýap berdi.
Jýrnalister ministrliktiń jańa jumys tártibine – 08:00-den 17:30-ǵa deiingi kestege aýysqanyna toqtalyp, bul basqa mekemelermen bailanys ornatýǵa qalai áser etkenin jáne qyzmetkerler úshin qanshalyq qolaily bolǵanyn surady.
Komitet tóraǵasy bul ózgeris ministrlik qyzmetine oń yqpal etkenin aitty.
"Tańǵy ýaqytta keptelis joq, jol ashyq. Saǵat 07:30-da shyqsań, jumysqa ýaqytynda, iaǵni 08:00-de kelip úlgeresiń. Bul óz kezeginde keshki ýaqytta otbasymen, jeke sharýalarmen ainalysýǵa múmkindik beredi", – dedi Erbolat Ábilhatin.
Onyń aitýynsha, basqa memlekettik organdarmen jumys barysynda eshqandai qiyndyqtar bolmaǵan. Sondai-aq, Astana máslihaty elordadaǵy ózge de mekemelerdiń jumys rejimin qaita qarastyrý múmkindigin talqylap jatqanyn atap ótti.
"Jumys berýshi kesteni óz yńǵaiyna qarai belgileidi. Qyzmetkerler tarapynan shaǵym túsken joq. Kerisinshe olardyń kóbi erte jumystan shyǵýǵa múmkindik týǵanyna riza", – dedi ol.
Jýrnalister aldaǵy qyrkúiekte mektep maýsymy bastalatynyn eske salyp, balalary bar qyzmetkerlerge qandai jaǵdai jasalatynyn surady. Buǵan jaýap retinde Ábilhatin ata-analar úshin ikemdi keste qarastyrylatynyn jetkizdi.
Onyń sózinshe, balalaryn mektepke aparýy nemese alyp ketýi qajet ata-analar jumysqa saǵat 09:00–10:00 aralyǵynda kele alady. Bastysy olar tolyq 8 saǵattyq jumys ýaqytyn oryndaýǵa tiis.
