استانادا بالاسىن بالاباقشا، مەكتەپكە اپاراتىن اتا-انالار جۇمىسقا كەشىرەك كەلە الادى، دەپ حابارلايدى Dalanews.kz. 

مەملەكەتتىك ەڭبەك ينسپەكسياسى كوميتەتىنىڭ ءتوراعاسى ەربولات ءابىلحاتين جاڭا جۇمىس كەستەسىنىڭ تيىمدىلىگى جونىندەگى سۇراققا جاۋاپ بەردى.

جۋرناليستەر مينيسترلىكتىڭ جاڭا جۇمىس تارتىبىنە – 08:00-دەن 17:30-عا دەيىنگى كەستەگە اۋىسقانىنا توقتالىپ، بۇل باسقا مەكەمەلەرمەن بايلانىس ورناتۋعا قالاي اسەر ەتكەنىن جانە قىزمەتكەرلەر ءۇشىن قانشالىق قولايلى بولعانىن سۇرادى.

كوميتەت ءتوراعاسى بۇل وزگەرىس مينيسترلىك قىزمەتىنە وڭ ىقپال ەتكەنىن ايتتى.

"تاڭعى ۋاقىتتا كەپتەلىس جوق، جول اشىق. ساعات 07:30-دا شىقساڭ، جۇمىسقا ۋاقىتىندا، ياعني 08:00-دە كەلىپ ۇلگەرەسىڭ. بۇل ءوز كەزەگىندە كەشكى ۋاقىتتا وتباسىمەن، جەكە شارۋالارمەن اينالىسۋعا مۇمكىندىك بەرەدى"، – دەدى ەربولات ءابىلحاتين.

ونىڭ ايتۋىنشا، باسقا مەملەكەتتىك ورگاندارمەن جۇمىس بارىسىندا ەشقانداي قيىندىقتار بولماعان. سونداي-اق، استانا ءماسليحاتى ەلورداداعى وزگە دە مەكەمەلەردىڭ جۇمىس رەجيمىن قايتا قاراستىرۋ مۇمكىندىگىن تالقىلاپ جاتقانىن اتاپ ءوتتى.

"جۇمىس بەرۋشى كەستەنى ءوز ىڭعايىنا قاراي بەلگىلەيدى. قىزمەتكەرلەر تاراپىنان شاعىم تۇسكەن جوق. كەرىسىنشە ولاردىڭ كوبى ەرتە جۇمىستان شىعۋعا مۇمكىندىك تۋعانىنا ريزا"، – دەدى ول.

جۋرناليستەر الداعى قىركۇيەكتە مەكتەپ ماۋسىمى باستالاتىنىن ەسكە سالىپ، بالالارى بار قىزمەتكەرلەرگە قانداي جاعداي جاسالاتىنىن سۇرادى. بۇعان جاۋاپ رەتىندە ءابىلحاتين اتا-انالار ءۇشىن يكەمدى كەستە قاراستىرىلاتىنىن جەتكىزدى.

ونىڭ سوزىنشە، بالالارىن مەكتەپكە اپارۋى نەمەسە الىپ كەتۋى قاجەت اتا-انالار جۇمىسقا ساعات 09:00–10:00 ارالىعىندا كەلە الادى. باستىسى ولار تولىق 8 ساعاتتىق جۇمىس ۋاقىتىن ورىنداۋعا ءتيىس.