Astanada tanymal ánshi Sivi Mahmýdidiń burynǵy kúieýi Ansar Qajymuhanulyna qatysty sot otyrysy bastaldy. Ol asa iri kólemde alaiaqtyq jasady dep aiyptalyp otyr. Ázirge istiń egjei-tegjeii ashyq jariialanbaǵanymen, biz onyń esimi atalǵan qylmystyq istiń mán-jaiyn anyqtap kórdik. Áńgime 50 myń dollar jaiynda, dep habarlaidy Dalanews.kz Nege.kz-ke siltep.
Ulytaý oblysynda byltyr oblystyq ǵylymi-ádistemelik ortalyq qyzmetkerlerine qatysty senip tapsyrylǵan múlikti iemdený faktisi boiynsha is qozǵalǵan bolatyn. Osy is aiasynda jasyryn tergeý amaldaryn júrgizgende, atalǵan ortalyqtyń bas býhgalteriniń elordalyq politsiia qyzmetkerlerin satyp almaq bolǵan áreketi áshkere boldy. Ol esirtki zattaryn satýǵa tyrysty degen aiyppen ustalǵan qyzynyń jazasyn jeńildetý úshin quqyq qorǵaý organdarynyń qyzmetkerlerine para usynǵan.
Sotta bas býhgalter áiel kinásin tolyq moiyndady. Onyń aitýynsha, 2024 jyldyń 28 naýryzynda advokattan qyzynyń Astanada esirtki saqtady jáne satýǵa árekettendi degen bappen ustalǵanyn estigen. Anasy úreilenip, tanys týysy arqyly «máseleni sheshe alatyn» adamdardy izdestire bastaidy. Sol kezde onyń týysynyń kúieý balasy 50 myń dollarǵa «máseleni sheshýge» ýáde bergen. Áiel bul somany eki bólikke bólip tólep beredi. Biraq, ýáde etilgendei, istiń babyn jeńildetý múmkin bolmaǵan.
Osy is boiynsha sotta sol áielge ýáde bergen azamat Ansar Qajymuhanulynyń esimin atady. Onyń aitýynsha, Ansar «mende bul máseleni sheshetin adamdar bar» dep sendirgen. Aqsha berilgennen keiin, ýáde etilgendei nátije shyqpaǵan soń, áiel tarapynan qarjyny qaitarý talap etiledi. Alaida, tergeý materialdaryna sáikes, Ansar Qajymuhanuly ýáde etilgen 50 myń dollardyń tek 28 myńyn ǵana qaitarǵan.
Tergeý qorytyndysy boiynsha, Ansar Qajymuhanulynyń Astana qalasy Almaty aýdanynyń politsiia bóliminde eshqandai da naqty bailanystary bolmaǵan. Alǵan qarajatty ol jeke basynyń paidasyna jumsaǵany aitylyp otyr.
Ansar Qajymuhanulynyń burynǵy jary, ánshi Sivi Mahmýdi jýyrda jýrnalist Anna Danchenkoǵa bergen suhbatynda burynǵy kúieýiniń tek balalaryna kómektespegenin ǵana emes, tipti oǵan qoqan-loqy kórsetip, qorqytqanyn da aityp berdi. Sivi óziniń qaýipsizdigi úshin basqa qalaǵa kóshýge májbúr bolǵanyn da málimdedi.
