Bilim kúni aiasynda Astanada 28 myń oqýshyǵa (2 aýysymda) arnalǵan jeti jańa mektep saltanatty túrde ashyldy. Barlyǵy ulttyq joba «Keleshek mektepteri» aiasynda boi kóterip, zamanaýi synyptarmen, zerthanalarmen jáne sport zaldarymen jabdyqtaldy,- dep habarlaidy Dalanews.kz
Barlyq mektep sońǵy tehnologiialar men jańa talaptarǵa sai jabdyqtalǵan. Eske sala keteiik, oqý oryndary Memleket basshysynyń tapsyrmasyna sáikes «Keleshek mektepteri» ulttyq jobasy aiasynda salynyp jatyr.
Jańa oqý oryndary qaýipsizdik pen tsifrlandyrý talaptaryna jaýap beredi. Olardyń basty maqsaty – balalarǵa jaily bilim berý ortasyn qurý, úsh aýysymdy oqytýdy joiý jáne mektepterdegi shamadan tys júktemeni azaitý.
Jańa bilim ordalarynyń ashylý rásimine QR Oqý-aǵartý vitse-ministrleri Edil Ospan, Maira Meldebekova jáne Asylbek Ahmetjanov, sondai-aq Astana qalasy ákiminiń orynbasary Eset Baiken men qalalyq Bilim basqarmasynyń ókilderi qatysty.
Jańa oqý jylynyń basynan bastap elordada 28 myń orynǵa arnalǵan (2 aýysymda) 7 jańa jaily mektep paidalanýǵa berildi. Jalpy alǵanda, oqý jyly ishinde 15 jańa mektep ashý josparlanyp otyr.
Ótken oqý jylynda rekordtyq kórsetkishpen 66 myń orynǵa arnalǵan (2 aýysymda) 24 mektep ashylǵan edi. Onyń ishinde 16-sy – «jaily mektepter». Bul sharalar úsh aýysymdy oqytý men mektepterdegi júkteme máselesin kezeń-kezeńimen sheshýge múmkindik berýde.
Aita keteiik, jańa oqý jyly qarsańynda elordada jalpy sany 206 mektep jumys istep tur. Onyń 122-si – memlekettik, 77-si – jekemenshik, 7-eýi – respýblikalyq mektep. Jalpy qamtylǵan oqýshylar sany 310 myńnan asady.
2025-2027 jyldarǵa arnalǵan bilim berý júiesin jańǵyrtý jospary sheńberinde 22 mektepti jańartý bekitilgen. 2025 jyly qazirdiń ózinde 6 bilim ordasyna kúrdeli jóndeý júrgizildi.
Budan bólek, biyl birinshi synypqa 31 myń bala bardy.
