Astana aglomeratsiiasyn damytatyn memorandým
– Astana qalasy aglomeratsiiasyna óziniń aýmaǵynan basqa Aqmola oblysyna qarasty 123 aýyldyq eldi-meken engen, olardyń jalpy aýmaǵy 21 770 km kvadrat jáne osy joba millionnan astam adamnyń ómirinde óte mańyzdy tetik atqarady. Biz Astana turǵyndaryn da jáne jaqyn mańdaǵy aýdan turǵyndaryn da alańdatyp otyrǵan máselelerdi sheshýde is-áreketti úilestirýimiz kerek. Bul aýmaqtyq josparlaý, jer, kólik qatynasyna bailanysty t.b. suraqtar. Sol sebepti, qala jáne oblystyń jaýapty qyzmetteri jol kartasyn ázirleýi kerek, oǵan barlyq suraqtardy saralap, toptastyryp, oǵan jaýapty mekemelerdi belgilep, naqty merzimin anyqtap iske asyrýǵa kirisýimiz kerek, – dep atap ótti memorandýmǵa qol qoiý barysynda Astana ákimi Áset Isekeshev.
Sondai-aq, memorandým indýstrialdy aimaqtardy damytýdy, jobalaý boiynsha usynystar qurýdy jáne iske asyrýǵa múmkindik beredi. Ol óz kezeginde Aqmola oblysynyń territoriiasyna jatatyn, biraq Astana qalasyna jaqyn ornalasqan (Shortandy, Jainaq, Arshaly) aýdandardyń damýyna serpin berýi tiis jáne de osy aýdandarda kóptep jumys oryndaryn, áleýmettik-mádeni infraqurylymdar ashý. Aýdandar básekege qabiletti jáne turǵyndardyń ómir súrý sapasy joǵary kópfýnktsionaldy aýmaq qurýǵa baǵyttalǵan, ómir súrý úshin tartymdy jáne kóshi-qon aǵyndaryn Astanadan ózderine tartatyn bolady. Sóitip aýdandar Astana mańaiynda aýyldardyń retsiz etek jaiýyna tosqaýyl bolýy tiis. Sonymen qatar, eki jaq Astana mańyndaǵy aýyldardy damytýda infrastrýktýrany, qoǵamdyq kólik qatynasyn jáne t.b. suraqtardy sheshýde naqty jospar qurýǵa kelisti.
– Búgingi memorandýmnyń Astana qalasy men Aqmola oblysynyń turǵyndaryna qajet ekeninde kúmán joq. Eń bastysy biz eki aimaq arasynda týyndap otyrǵan máselelerdi quqyqtyq baza aiasynda sheshýge jáne bolashaqta osy problemalar qaita týyndamaý úshin áreket etýdemiz, – dedi Aqmola oblysynyń ákimi Málik Myrzalin.
