– Elordada 200-den astam úi ornalasqan «Nur-besik» shaǵyn aýdany (Kóktal 1 eldi mekeni) bar. Munda myńnan astam adam turaqty túrde turyp keledi. Bul shaǵyn aýdanda qala turǵyndary 2007 jyldan beri turyp jatqanymen, 16 jyldan beri úilerine quqyq belgileitin qujattary bolmaǵan.
Sol sebepti olar óz úilerine zańdy túrde tirkete almaǵan. Osylaisha olardyń emdeý mekemelerine tirkelýine, balalaryn balabaqshaǵa, mektepke berý máselesi qiyn bolǵany jasyryn emes. Budan keiin shaǵyn aýdany turǵyndary týystarynyń úilerine tirkelip, máselelerin sheship keldi, – dedi qala basshysy.
Astana qalasy ákimdigi «Nur-besik» shaǵyn aýdanynyń turǵyndary jer ýchaskelerin zańdastyrý máselesi boiynsha birinshe kezdesý ótkizgen bolatyn. Qala basshysy Jeńis Qasymbek sol kezdesýlerden keiin shaǵyn aýdan turǵyndarynyń máselesi oń baǵytta sheshilgenin alǵa tartty.
– Bizder bul baǵytta aýqymdy jumystar júrgizip, tehnikalyq máselelerdiń bárin sheshtik. Qazirgi ýaqytta turǵyndarǵa quqyq belgileitin qujattardy berý rásimi júrip jatyr. Endi olardy resmi túrde elorda turǵyndary dep aitýǵa bolady. Aýdan turǵyndary araǵa 16 jyl salyp úilerin tirkeý quqyǵyna ie boldy.
Búginde shaǵyn aýdandy abattandyrýmen de ainalysyp jatyrmyz. Sýmen jabdyqtaý, sý burý, nóser kárizi, elektrmen jabdyqtaý, gazben jabdyqtaý syndy injenerlik jelilerdiń qurylysy boiynsha jumys aiaqtaldy. Sol siiaqty aldaǵy ýaqytta kóshelerge asfalt tóseldi, jaryqtandyrý baǵanalary, 3 aialdama, internet ornatylatyn bolady. Ákimdik qala mańyndaǵy eldi mekenderin damytýdy ary qarai jalǵastyra beretin bolady, – dedi Jeńis Qasymbek.
