Arpaózen petroglifterin qorǵaýǵa alý, týrizm klasterin damytý boiynsha mamandarmen pikir almasty.
– Qarataýdyń qatpary tarih pen shejirege toly. Onyń ishinde Arpaózen petroglifteriniń orny airyqsha. Biraq osy tańǵajaiyp tarihi mura týraly kópshilik jaqsy biledi dei almaimyz. Myńjyldyqtarǵa jeteleitin aspan astyndaǵy tarihi jádigerdi saqtap qalýymyz kerek. Osy baǵytta tarihshylar men zertteýshilerdiń pikirleri nazarǵa alynady, – dedi Darhan Satybaldy.
Zertteýshilerdiń aitýynsha, Sozaqtaǵy Kelinshektaý jotasynyń mańynda ornalasqan petroglifter 4-5 myń jyldy qamtyǵan. Qola dáýirinen saqtalǵan qundy eskertkishterde adamdardyń sýreti, jan-janýarlardyń beinesi, sol zamannan syr shertetin kórinister sýrettelgen. Ógiz jáne túie jekken sharýashylyq arbalary, jaýyngerlik arbalary, kún jáne ózge de uǵymdar tańbalanǵan.
QR UǴA akademigi, tarih ǵylymdarynyń doktory Baýyrjan Baitanaevtyń aitýynsha, Arpaózen petroglifterin qorǵaý, nasihattaýdyń mańyzy zor.
– Munda bizdiń tarihymyz jatyr. Arpaózen petroglifteri siiaqty jaqsy saqtalǵan jáne aýqymdy muralar álemde sirek kezdesedi. Túrkistan óńirinde osyndai tańbaly tastardyń kóp ekenine qýanýymyz kerek. Ásirese, Qarataýdyń jotalary tarihqa bai. Bizdiń maqsatymyz – osy tarihi murany saqtaý jáne qorǵaý aýmaǵyn anyqtaý.
Eger tańbaly tastardy IýNESKO-nyń mádeni-tarihi muralar tizimine engize alsaq, bul aýmaqqa shetelden týrister keledi. Týrizm klasteri damidy, jumys oryndary ashylady. Arpaózen petroglifteriniń áleýeti óte joǵary. Bul aýmaqty qorǵaý, tipti kúzet uiymdastyrǵan jón. Tańbaly tastardy búldirip, ústinen sýret salyp ketetinderden saqtaý – ýaqyt talaby, – deidi akademik.
Aldaǵy ýaqytta Arpaózen petroglifterin arnaiy qorǵaýǵa alý jumystary josparlanyp otyr. Bul bastama Túrkistan oblysynda mádenietti damytý tujyrymdamasyna engizilgen. Tańbaly tastardy qorǵaý jumystary 2 kezeńnen turady. Petroglifter túgel sýretke túsirilip, tólqujaty jasalady. Oǵan ǵalymdar toby tartylady. Bul jumys biyl jáne kelesi jyly iske asady degen jospar bar. Ekinshiden, Arpaózen petroglifterin IýNESKO-nyń tarihi jáne mádeni muralar tizimine engizý qolǵa alynady. Osy maqsatta elimizdiń ǵalymdary tiisti usynystar ázirleeidi dep kútilip otyr.
