Áleýmettik jelide áskeri boryshyn óteýge barǵan sarbazdyń úsh saýsaǵynan aiyrylǵany týraly aqparat tarady, dep habarlaidy Dalanews.kz.
Jábirlenýshiniń týysy Malika Abdalievanyń sózinshe, Tuńǵyshbai Baǵjan esimdi azamat áskeri qyzmet kezinde aýyr jaraqat alǵan. Sarbaz 2025 jyldyń jeltoqsan aiynda Almatyda oqý-jattyǵýdan ótip, keiin Otar mańyndaǵy áskeri bólimge jiberilgen. Qazirgi ýaqytta ol Almaty qalasyndaǵy hirýrgiia bóliminde em qabyldap jatyr.
"Úlken kelinimniń aǵasynyń uly áskerge ketken. Almatyda oqý-jattyǵýda bolyp, jeltoqsan aiynda Otarǵa áskeri boryshyn óteýge barǵan. Qazir 10 kúnnen beri Almaty qalalyq aýrýhanasynyń hirýrgiia bóliminde jatyr. Úsh saýsaǵynan aiyrylypty", - dep jazdy ol.
Sondai-aq jazbada jábirlenýshiniń jaqyndarynyń joldaǵan hattary da kórsetilgen. Onda sarbaz áskeri qyzmet barysynda psihologiialyq qysymǵa ushyraǵanyn ashyq jetkizgen.
"Meni áketpeseńiz, tabytymdy áketesiz", - dep jazǵan sarbaz ákesine.
Atalǵan aqparat qoǵamda rezonans týdyrǵannan keiin, Dalanews.kz redaktsiiasy jaǵdaidy naqtylaý maqsatynda Qorǵanys ministrligine resmi saýal joldady.
Ministrliktiń bergen jaýabyna sáikes, oqiǵa 2026 jyly 6 qańtarda Gvardeisk garnizonynda ornalasqan áskeri bólimderdiń birinde bolǵan. Vedomstvo tańǵy tekseris barysynda áskeri qyzmetshi sol qolynyń saýsaqtaryn metall zatpen jaraqattap alǵanyn málimdedi.
"Zardap shekken áskeri qyzmetshi shuǵyl túrde áskeri gospitalǵa jetkizilip, oǵan ýaqytyly meditsinalyq kómek kórsetildi. Qazirgi ýaqytta onyń jaǵdaiy turaqty, ómiri men densaýlyǵyna qaýip joq. Almatydaǵy Ulttyq ǵylymi hirýrgiia ortalyǵynda em qabyldap jatyr", - dep málimdedi ministrlik.
Sonymen qatar vedomstvo áleýmettik jelide taraǵan aqparatty joqqa shyǵardy.
"Zardap shegýshiniń aitýynsha, bul áreket jeke bas sebepterine bailanysty jasalǵan jáne áskeri qyzmetti ótkerýmen, sondai-aq áskeri bólim komandirleriniń nemese laýazymdy tulǵalardyń áreketterine qatysy joq. Iaǵni, áleýmettik jelide taraǵandai “tikelei basshysynyń eskertýinen keiin jaraqat alynǵan” degen aqparat shyndyqqa janaspaidy", - dedi olar.
Qazirgi tańda atalǵan derek boiynsha qylmystyq is qozǵalǵan.
"Qazaqstan Respýblikasy Ishki ister ministrliginiń Ońtústik óńirlik áskeri-tergeý basqarmasynyń Gvardeisk bólimi oqiǵanyń barlyq mán-jaiyn jan-jaqty jáne obektivti anyqtaýǵa baǵyttalǵan tergeý is-sharalaryn júrgizýde. Jaǵdai Qurlyq áskerleri qolbasshylyǵynyń baqylaýynda", - dep túiindedi ministrlik.
