Áskerde júrgende bas-mi jaraqatyn alyp, komaǵa túsken Erbaian Muhtarǵa Ystanbulda sátti ota jasaldy, dep habarlaidy Dalanews.kz.
Bul jańalyqty belgili zańger Inga Imanbai Facebook paraqshasynda jazdy.
“Jelide Erbaiannyń jaǵdaiyn surap, habarlasyp jatqan aǵaiynǵa myń alǵys. Qazir Erbaiannyń jaǵdaiy birqalypty, Stambulda emin jalǵastyryp jatyr. Birinshi turǵan foto búgin jasaldy. Ekinshi foto Stambulǵa kelgen kezde basyna jasalǵan otadan keiingi kezi. Qudaiǵa shúkir ota sátti jasalyp, endi reabilitatsiialyq em-shara, emdik dene shynyqtyrý protsedýralary bastaldy”, - dedi ol.
Aitýynsha, qalpyna kelý biraz ýaqytty talap etedi.
“Oǵan daiynbyz. Ary qarai Erbaiannyń jigeri men dárigerlerdiń kásibiligine senemiz. Erbaianymyzdy izdep, surap, niettes bolǵandaryńyzǵa myń alǵys. Qazirge jańalyǵymyz osy. Aitarlyqtai ózgeris, jaqsy jańalyǵymyz bolsa mindetti túrde Sizdermen bólisemiz”, - dep jazdy Inga Imanbai.
Aita keteiik, buǵan deiin Inga Imanbai Erbaian Muhtardy jaqyndary emdetý úshin Túrkiiaǵa alyp ketkenin málimdegen bolatyn.
Eske salaiyq, byltyr jeltoqsan aiynda Ulttyq ulan jaýyngeri Erbaian Muhtar komaǵa tústi.
QR IIM Ulttyq ulanynyń baspasóz qyzmeti sarbazdyń densaýlyǵyna qatysty resmi málimdeme jasaǵan bolatyn.
Ulttyq ulannyń habarlaýynsha, qatardaǵy Erbaian Muhtardyń bas jaraqatyn alý faktisi boiynsha QR QK 440-baby 4-tarmaǵynyń 3-bóligine sai qylmystyq is qozǵalǵan. Bul jerde áskeri qyzmetshiler arasyndaǵy ózara qarym-qatynastardyń jarǵylyq erejelerin buza otyryp, densaýlyqqa aýyr ziian keltirgeni másele bolyp otyr.
