Jetisý oblysynda aýyl halqy úshin meditsinalyq qyzmetterdiń qoljetimdiligi men sapasyn arttyrý maqsatynda «Ashyq esik kúni» profilaktikalyq jobasy bastaldy. Bul áleýmettik aktsiia aiasynda oblystyń salalyq dárigerleri aýdandyq ortalyqtarda tegin qabyldaý júrgizip, keńes beredi,- dep habarlaidy Dalanews.kz
Áleýmettik aktsiia sheńberinde oblystyń jetekshi meditsinalyq uiymdarynan LOR, ýrolog, proktolog, akýsher-ginekolog, balalar hirýrgi, nevropatolog, neirohirýrg, pediatr, travmatolog jáne onkolog mamandar kelip, qabyldaý júrgizýde.
Áleýmettik joba aldymen Kerbulaq aýdanynan bastaldy. Saryózek aýylyndaǵy aýdandyq emhanada dárigerler bir kúnde 178 naýqasty, sonyń ishinde 28 balany qabyldady. 17 adam qosymsha tekseriske jiberilse, taǵy 25 adam oblystyq aýrýhanaǵa statsionarlyq emge joldama aldy.
Aýdan turǵyndarynyń aitýynsha, mundai sharalar aýyl halqy úshin óte paidaly ári yńǵaily.
- Densaýlyǵymdaǵy kinárattar 2021 jyldan beri mazalap júrgen. Qalqansha bezine ota jasatqanmyn. Úsh ai saiyn tekserýden ótip turamyn. Búgin ýchaskelik dárigerdiń joldamasymen keldim. Qabyldaýdy oblystan kelgen maman júrgizdi, endi Taldyqorǵanǵa barýdyń qajeti joq. Dárigerlerdiń jyly qarsy alyp, yqylaspen qabyldaǵanyna riza boldym, – dedi Basshi aýylynyń turǵyny Rozagúl Derbisova.
Al Saryózek aýylynyń turǵyny, bes balanyń anasy Qyzǵaldaq Raijanova qabyldaýǵa eki jasar ulymen keldi.
– Ulym aýyr pnevmoniiamen aýyrǵan, biraq jergilikti dárigerlerdiń kómegimen tolyq jazyldy. Búgin bári durys ekenine kóz jetkizý úshin taǵy bir tekserilgimiz keldi. Mundai sharalar kópbalaly otbasylar úshin óte qajet. Bizge kórsetilgen qolaily jaǵdai úshin alǵysymdy bildiremin, – dedi jergilikti turǵyn.
Óz kezeginde meditsina mamandary mundai profilaktikalyq aktsiialardyń ýaqtyly diagnostika jasaýǵa, odan ári sapaly em alýǵa múmkindik beretinin atap ótti:
- Búgin ata-analar balalaryn túrli shaǵymdarmen alyp keldi. Barlyǵyn qabyldaýǵa tyrystyq, óitkeni balanyń densaýlyǵy – árqashan birinshi orynda. Balalar – bolashaǵymyz, sondyqtan olarǵa qamqor bolý – bizdiń mindetimiz, – dedi Taldyqorǵan qalasyndaǵy №2 emhananyń pediatry Orynbasar Tóleýbaeva.
Oblystyq kópsalaly klinikanyń onkolog dárigeri, direktordyń meditsinalyq qyzmetterdiń sapasyn baqylaý jónindegi orynbasary Baýyrjan Bertaev ta pikir qosty:
– Biz 178 adamdy qaradyq. Birqatar naýqastarǵa qosymsha tekserý qajet, keibireýlerin statsionarǵa joldadyq. Basty maqsatymyz – adamdarǵa densaýlyq jaǵdaiyn týraly naqty qorytyndy jasap, tiisti usynystar berý. Bul – onkologiialyq aýrýlardyń aldyn alý men erte anyqtaýda asa mańyzdy, – dedi ol.
Uiymdastyrýshylardyń aitýynsha, «Ashyq esik kúni» jobasy jeltoqsan aiynyń basyna deiin oblystyń barlyq aýdandarynda ótedi, bul shara sapaly meditsinaǵa qoljetimdilikti arttyrýǵa baǵyttalǵan.
Al kelesi baratyn baǵyt – Tekeli qalasy.
- Osy tájiribe arqyly «Ashyq esik kúni» formatynyń qanshalyqty qajet ekenin kórdik. Ásirese shalǵai aýyl turǵyndary oblys ortalyǵyna barmai-aq, salalyq mamandardan keńes alý múmkindigine ie bolady. Mundai profilaktikalyq sharalardy turaqty túrde ótkizip, mobildi meditsinalyq brigadalardy kúsheitemiz, ári tekserý túrlerin keńeitemiz, – dep atap ótti oblystyq densaýlyq saqtaý basqarmasynyń basshysy Asqar Sadyqov.
