جەتىسۋ وبلىسىندا اۋىل حالقى ءۇشىن مەديسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ ماقساتىندا «اشىق ەسىك كۇنى» پروفيلاكتيكالىق جوباسى باستالدى. بۇل الەۋمەتتىك اكسيا اياسىندا وبلىستىڭ سالالىق دارىگەرلەرى اۋداندىق ورتالىقتاردا تەگىن قابىلداۋ جۇرگىزىپ، كەڭەس بەرەدى،- دەپ حابارلايدى Dalanews.kz
الەۋمەتتىك اكسيا شەڭبەرىندە وبلىستىڭ جەتەكشى مەديسينالىق ۇيىمدارىنان لور، ۋرولوگ، پروكتولوگ، اكۋشەر-گينەكولوگ، بالالار حيرۋرگى، نيەۆروپاتولوگ، نەيروحيرۋرگ، پەدياتر، تراۆماتولوگ جانە ونكولوگ ماماندار كەلىپ، قابىلداۋ جۇرگىزۋدە.
الەۋمەتتىك جوبا الدىمەن كەربۇلاق اۋدانىنان باستالدى. سارىوزەك اۋىلىنداعى اۋداندىق ەمحانادا دارىگەرلەر ءبىر كۇندە 178 ناۋقاستى، سونىڭ ىشىندە 28 بالانى قابىلدادى. 17 ادام قوسىمشا تەكسەرىسكە جىبەرىلسە، تاعى 25 ادام وبلىستىق اۋرۋحاناعا ستاسيونارلىق ەمگە جولداما الدى.
اۋدان تۇرعىندارىنىڭ ايتۋىنشا، مۇنداي شارالار اۋىل حالقى ءۇشىن وتە پايدالى ءارى ىڭعايلى.
- دەنساۋلىعىمداعى كىناراتتار 2021 جىلدان بەرى مازالاپ جۇرگەن. قالقانشا بەزىنە وتا جاساتقانمىن. ءۇش اي سايىن تەكسەرۋدەن ءوتىپ تۇرامىن. بۇگىن ۋچاسكەلىك دارىگەردىڭ جولداماسىمەن كەلدىم. قابىلداۋدى وبلىستان كەلگەن مامان جۇرگىزدى، ەندى تالدىقورعانعا بارۋدىڭ قاجەتى جوق. دارىگەرلەردىڭ جىلى قارسى الىپ، ىقىلاسپەن قابىلداعانىنا ريزا بولدىم، – دەدى باسشي اۋىلىنىڭ تۇرعىنى روزاگۇل دەربىسوۆا.
ال سارىوزەك اۋىلىنىڭ تۇرعىنى، بەس بالانىڭ اناسى قىزعالداق رايجانوۆا قابىلداۋعا ەكى جاسار ۇلىمەن كەلدى.
– ۇلىم اۋىر پنيەۆمونيامەن اۋىرعان، ءبىراق جەرگىلىكتى دارىگەرلەردىڭ كومەگىمەن تولىق جازىلدى. بۇگىن ءبارى دۇرىس ەكەنىنە كوز جەتكىزۋ ءۇشىن تاعى ءبىر تەكسەرىلگىمىز كەلدى. مۇنداي شارالار كوپبالالى وتباسىلار ءۇشىن وتە قاجەت. بىزگە كورسەتىلگەن قولايلى جاعداي ءۇشىن العىسىمدى بىلدىرەمىن، – دەدى جەرگىلىكتى تۇرعىن.
ءوز كەزەگىندە مەديسينا ماماندارى مۇنداي پروفيلاكتيكالىق اكسيالاردىڭ ۋاقتىلى دياگنوستيكا جاساۋعا، ودان ءارى ساپالى ەم الۋعا مۇمكىندىك بەرەتىنىن اتاپ ءوتتى:
- بۇگىن اتا-انالار بالالارىن ءتۇرلى شاعىمدارمەن الىپ كەلدى. بارلىعىن قابىلداۋعا تىرىستىق، ويتكەنى بالانىڭ دەنساۋلىعى – ءارقاشان ءبىرىنشى ورىندا. بالالار – بولاشاعىمىز، سوندىقتان ولارعا قامقور بولۋ – ءبىزدىڭ مىندەتىمىز، – دەدى تالدىقورعان قالاسىنداعى №2 ەمحانانىڭ پەدياترى ورىنباسار تولەۋبايەۆا.
وبلىستىق كوپسالالى كلينيكانىڭ ونكولوگ دارىگەرى، ديرەكتوردىڭ مەديسينالىق قىزمەتتەردىڭ ساپاسىن باقىلاۋ جونىندەگى ورىنباسارى باۋىرجان بەرتايەۆ تا پىكىر قوستى:
– ءبىز 178 ادامدى قارادىق. ءبىرقاتار ناۋقاستارعا قوسىمشا تەكسەرۋ قاجەت، كەيبىرەۋلەرىن ستاسيونارعا جولدادىق. باستى ماقساتىمىز – ادامدارعا دەنساۋلىق جاعدايىن تۋرالى ناقتى قورىتىندى جاساپ، ءتيىستى ۇسىنىستار بەرۋ. بۇل – ونكولوگيالىق اۋرۋلاردىڭ الدىن الۋ مەن ەرتە انىقتاۋدا اسا ماڭىزدى، – دەدى ول.
ۇيىمداستىرۋشىلاردىڭ ايتۋىنشا، «اشىق ەسىك كۇنى» جوباسى جەلتوقسان ايىنىڭ باسىنا دەيىن وبلىستىڭ بارلىق اۋداندارىندا وتەدى، بۇل شارا ساپالى مەديسيناعا قولجەتىمدىلىكتى ارتتىرۋعا باعىتتالعان.
ال كەلەسى باراتىن باعىت – تەكەلى قالاسى.
- وسى تاجىريبە ارقىلى «اشىق ەسىك كۇنى» فورماتىنىڭ قانشالىقتى قاجەت ەكەنىن كوردىك. اسىرەسە شالعاي اۋىل تۇرعىندارى وبلىس ورتالىعىنا بارماي-اق، سالالىق مامانداردان كەڭەس الۋ مۇمكىندىگىنە يە بولادى. مۇنداي پروفيلاكتيكالىق شارالاردى تۇراقتى تۇردە وتكىزىپ، ءموبيلدى مەديسينالىق بريگادالاردى كۇشەيتەمىز، ءارى تەكسەرۋ تۇرلەرىن كەڭەيتەمىز، – دەپ اتاپ ءوتتى وبلىستىق دەنساۋلىق ساقتاۋ باسقارماسىنىڭ باسشىسى اسقار سادىقوۆ.
