Astana qalasy Saryarqa aýdanynyń prokýratýrasy QR Bas prokýrorynyń bastamasymen mamandandyrylǵan halyqqa qyzmet kórsetý ortalyǵynda «Ashyq esik kúnin» ótkizdi,- dep habarlaidy Dalanews.kz
Is-shara «Zań jáne Tártip» qaǵidasy aiasynda uiymdastyrylyp, turǵyndardyń quqyqtyq saýattylyǵyn arttyrý, ózekti máselelerdi jedel sheshý jáne halyqpen ashyq dialog ornatý maqsatyn kózdedi. Qabyldaýǵa quqyq qorǵaý organdarynyń ókilderimen qatar jergilikti atqarýshy organdar da qatysty.
Ashyq esik kúni aiasynda azamattar turǵyn úi, eńbek, áleýmettik jáne qylmystyq quqyq salalaryna qatysty suraqtar qoiyp, bilikti keńes aldy. Sharanyń ashyq ári tiimdi formatta ótýine jergilikti bilik te atsalysty.
Astana qalasy Saryarqa aýdanynyń ákimi Janasyl Shaýkentaev bul bastamanyń halyqqa qajetti ári paidaly ekenin atap ótti.
«Bul quqyqtyq organdardyń uiymdastyrýymen jasalyp jatqan shara. Onyń ishinde Saryarqa aýdany ákimdigi, QR Bas prokýrorynyń bastamasymen halyqqa keńes berý, máselelerine qatysty suraqtaryn qoiý úshin Ashyq esik kúni uiymdastyrylyp otyr», – dedi aýdan ákimi.
Is-shara barysynda eń kóp qoiylǵan suraqtardyń biri – jaqynda jariialanǵan raqymshylyqqa qatysty boldy.
Saryarqa aýdany prokýratýrasynyń tergeý bóliminiń bastyǵy Aidar Sovetov bul jaily naqty túsindirme berdi.
«Qazirgi tańda kóbinese keletin suraqtardyń biri – qylmystyq quqyqbuzýshylyqtar boiynsha jáne ákimshilik jaýapkershilikke tartylǵan adamdarǵa qandai sharalar qoldanylyp, qandai jeńildikter qarastyrylatyny týraly. Naqty aitqanda, osy aidyń 23-i kúni shyǵarylǵan amnistiianyń qalai qoldanylatyny kópshilikti qyzyqtyrady. Bul máseleler boiynsha aryzdar qabyldanyp, probatsiialyq qyzmetpen birlesip talqylanýda», – dedi.
Politsiia salasyna qatysty da ózekti máseleler kóterildi. Astana qalasy Saryarqa aýdany Politsiia basqarmasy bastyǵynyń orynbasary Qairat Tilepovtiń aitýynsha, turǵyndar negizinen tynyshtyqty buzý jaǵdailary týraly shaǵymdanǵan.
«Halyqqa qyzmet kórsetý ortalyǵynda júrgen azamattar kelip suraqtaryn qoiyp jatyr. Politsiia máselesine keletin bolsaq, túngi ýaqytta aýlalarda, fýtbol alańdarynda tynyshtyqty buzǵandar jaiynda suraqtar qoiyldy. Biz bolsaq suraqtaryna jaýap berip, QR Ákimshilik quqyqbuzýshylyq týraly kodeksiniń 437-babyn túsindirip aittyq», – dedi ol.
