استانا قالاسى سارىارقا اۋدانىنىڭ پروكۋراتۋراسى ق ر باس پروكۋرورىنىڭ باستاماسىمەن مامانداندىرىلعان حالىققا قىزمەت كورسەتۋ ورتالىعىندا «اشىق ەسىك كۇنىن» وتكىزدى،- دەپ حابارلايدى Dalanews.kz
ءىس-شارا «زاڭ جانە ءتارتىپ» قاعيداسى اياسىندا ۇيىمداستىرىلىپ، تۇرعىنداردىڭ قۇقىقتىق ساۋاتتىلىعىن ارتتىرۋ، وزەكتى ماسەلەلەردى جەدەل شەشۋ جانە حالىقپەن اشىق ديالوگ ورناتۋ ماقساتىن كوزدەدى. قابىلداۋعا قۇقىق قورعاۋ ورگاندارىنىڭ وكىلدەرىمەن قاتار جەرگىلىكتى اتقارۋشى ورگاندار دا قاتىستى.
اشىق ەسىك كۇنى اياسىندا ازاماتتار تۇرعىن ءۇي، ەڭبەك، الەۋمەتتىك جانە قىلمىستىق قۇقىق سالالارىنا قاتىستى سۇراقتار قويىپ، بىلىكتى كەڭەس الدى. شارانىڭ اشىق ءارى ءتيىمدى فورماتتا وتۋىنە جەرگىلىكتى بيلىك تە اتسالىستى.
استانا قالاسى سارىارقا اۋدانىنىڭ اكىمى جاناسىل شاۋكەنتايەۆ بۇل باستامانىڭ حالىققا قاجەتتى ءارى پايدالى ەكەنىن اتاپ ءوتتى.
«بۇل قۇقىقتىق ورگانداردىڭ ۇيىمداستىرۋىمەن جاسالىپ جاتقان شارا. ونىڭ ىشىندە سارىارقا اۋدانى اكىمدىگى، ق ر باس پروكۋرورىنىڭ باستاماسىمەن حالىققا كەڭەس بەرۋ، ماسەلەلەرىنە قاتىستى سۇراقتارىن قويۋ ءۇشىن اشىق ەسىك كۇنى ۇيىمداستىرىلىپ وتىر»، – دەدى اۋدان اكىمى.
ءىس-شارا بارىسىندا ەڭ كوپ قويىلعان سۇراقتاردىڭ ءبىرى – جاقىندا جاريالانعان راقىمشىلىققا قاتىستى بولدى.
سارىارقا اۋدانى پروكۋراتۋراسىنىڭ تەرگەۋ ءبولىمىنىڭ باستىعى ايدار سوۆەتوۆ بۇل جايلى ناقتى تۇسىندىرمە بەردى.
«قازىرگى تاڭدا كوبىنەسە كەلەتىن سۇراقتاردىڭ ءبىرى – قىلمىستىق قۇقىقبۇزۋشىلىقتار بويىنشا جانە اكىمشىلىك جاۋاپكەرشىلىككە تارتىلعان ادامدارعا قانداي شارالار قولدانىلىپ، قانداي جەڭىلدىكتەر قاراستىرىلاتىنى تۋرالى. ناقتى ايتقاندا، وسى ايدىڭ 23ء-ى كۇنى شىعارىلعان امنيستيانىڭ قالاي قولدانىلاتىنى كوپشىلىكتى قىزىقتىرادى. بۇل ماسەلەلەر بويىنشا ارىزدار قابىلدانىپ، پروباسيالىق قىزمەتپەن بىرلەسىپ تالقىلانۋدا»، – دەدى.
پوليسيا سالاسىنا قاتىستى دا وزەكتى ماسەلەلەر كوتەرىلدى. استانا قالاسى سارىارقا اۋدانى پوليسيا باسقارماسى باستىعىنىڭ ورىنباسارى قايرات تىلەپوۆتىڭ ايتۋىنشا، تۇرعىندار نەگىزىنەن تىنىشتىقتى بۇزۋ جاعدايلارى تۋرالى شاعىمدانعان.
«حالىققا قىزمەت كورسەتۋ ورتالىعىندا جۇرگەن ازاماتتار كەلىپ سۇراقتارىن قويىپ جاتىر. پوليسيا ماسەلەسىنە كەلەتىن بولساق، تۇنگى ۋاقىتتا اۋلالاردا، فۋتبول الاڭدارىندا تىنىشتىقتى بۇزعاندار جايىندا سۇراقتار قويىلدى. ءبىز بولساق سۇراقتارىنا جاۋاپ بەرىپ، ق ر اكىمشىلىك قۇقىقبۇزۋشىلىق تۋرالى كودەكسىنىڭ 437-بابىن ءتۇسىندىرىپ ايتتىق»، – دەدى ول.
