Zergerlik buıymdardy satyp alý syltaýymen alaıaqtyq jasady degen kúdikke ilingen áıel Túrkıadan qaıtaryldy, dep habarlaıdy Dalanews.kz.
Bas prokýratýra men Interpol Ulttyq ortalyq búrosy QR Syrtqy ister mınıstrliginiń járdemdesýimen Túrkıa Respýblıkasynan birneshe ret alaıaqtyq jasaǵany úshin izdeýde júrgen Qazaqstan Respýblıkasynyń azamatyn elge qaıtardy.
Kúdikti 2024 jyly Qyzylorda qalasynda jábirlenýshilerge zergerlik buıymdardy tómen baǵamen satyp alyp beremin dep ýáde berip, aldaý jolymen olardyń aqshalaryn ıemdengen. Onyń qylmystyq áreketteri saldarynan 8 adam japa shegip, olarǵa jalpy somasy shamamen 130 mln teńgege materıaldyq zalal kelgen.
"Qylmystardy jasaǵannan keıin kúdikti el aýmaǵynan tys jerge boı tasalap, oǵan halyqaralyq izdeý jarıalanǵan. Júrgizilgen izdestirý is-sharalary barysynda ol Túrkıa Respýblıkasynyń aýmaǵynda ustaldy. Qazir kúdikti tergeý ızolátoryna qamaldy", - dep jazylǵan habarlamada.
