Túrkistan oblysynda úsh adam qaza taýyp, eki adam jaraqat alǵan jol apaty boiynsha qylmystyq is qozǵaldy, dep habarlaidy dalanews.kz.
Aldyn ala málimet boiynsha Arys qalasynda JAC markaly kóliktiń júrgizýshisi mas kúiinde birneshe adamdy qaǵyp, qashyp ketken.
Oqiǵa ornyna politsiia qyzmetkerleri dereý shyqqan. Jedel izdestirý is-sharalary nátijesinde kúdikti ustalyp, ýaqytsha ustaý izoliatoryna qamaýǵa alynǵan.
"Oqiǵa ornynda úsh adam, onyń ishinde eki kámeletke tolmaǵan jasóspirim qaitys boldy. Zardap shekken 2 adam meditsinalyq mekemege jetkizilip, olarǵa kómek kórsetildi. Qazir jedel tergeý toby mán-jaidy jan-jaqty, tolyq anyqtaýǵa baǵyttalǵan barlyq is-sharany júrgizip jatyr. Tergeý qorytyndysy boiynsha tiisti protsestik sheshim qabyldanady", - dedi Túrkistan oblysy PD baspasóz qyzmeti ókili.
