Arqalyqtyń sý qubyryn qaita jańǵyrtý jáne “Arqalyq JEO-nyń №2 týrboagregatyn 2,5 MVt qýatymen almastyrý” jobalarynda qarjy bylyǵy anyqtalǵanyna qaramastan, sot qylmystyq isti toqtatty, dep habarlaidy Dalanews.kz.
2022 jyldyń tamyzynda atalǵan is boiynsha qoǵam belsendileri dabyl qaǵa bastady. Atap aitqanda, qoǵam belsendisi Aset Bailin bul jobalarǵa bólingen qarajattyń zańdylyǵyn tekserýdi surap, memlekettik aýdit departamentine júgingen.
Aýdit barysynda Biýdjet kodeksiniń birneshe babynyń óreskel buzylǵany anyqtaldy. Osydan soń atalǵan fakti boiynsha qylmystyq is qozǵalyp, Qostanai oblysy prokýratýrasynyń arnaiy prokýrorlar basqarmasy tergeýdi qolǵa aldy.
2024 jyldyń jeltoqsanynda Arqalyq qalasynyń burynǵy turǵyn úi-kommýnaldyq sharýashylyq bóliminiń basshysy, qazirgi tańda “ÝKStroi” JShS jobasynyń jetekshisi Talǵat Jeksembin sot aldynda jaýap berdi. Oǵan “salǵyrttyq” baby boiynsha aiyp taǵyldy.
Alaida Jeksembin jasaǵan áreket “jeńil qylmys” sanatyna jatatyn bolǵandyqtan, qylmys jasalǵan kúnnen bastap sotqa deiingi aralyqta eki jyldan astam ýaqyt ótip ketken. Osy sebeppen sot isti toqtatý týraly sheshim qabyldady.
“Qazirgi tańda keltirilgen naqty shyǵyn kólemi 557 967 900 teńgeni quraidy. Bul qarajat biýdjetke áli kúnge deiin qaitarylǵan joq, talap-aryzdar boiynsha sot protsesteri jalǵasýda. Sarapshylardyń qorytyndysy boiynsha jańa jylý elektr ortalyǵy qalypty jumys istep tur degenimen, qala turǵyndarynyń aitýynsha, ortalyqtyń jumysy turaqty bolmaǵan. Qys maýsymy kezinde mazýt jaǵylǵan, al bul qalada jii jarylystarǵa uqsas qatty dybystardyń shyǵýyna sebep boldy”, — deidi Aset Bailin.
Kóp tomnan turatyn sharttar, zańbuzýshylyqtar tizimi, quqyq qorǵaý organdary arasyndaǵy hat almasýlar, prokýrorlar men antikorrýptsiialyq qyzmetkerlerdiń ailap júrgizgen jumysy — bári aqyry dalaǵa ketken tárizdi.
