Memleket basshysy Armeniia Ulttyq jinalysynyń tóraǵasy Alen Simoniandy qabyldady, dep habarlaidy Dalanews.kz.
Qasym-Jomart Toqaev mártebeli meimanǵa iltipat bildirip, Armeniia Parlamenti Spikeriniń sapary ekijaqty yntymaqtastyqty tereńdetý turǵysynan mańyzǵa ie ekenin aitty. Prezident ózara yqpaldastyqty ilgeriletýge zań shyǵarýshy organdar tarapynan jan-jaqty qoldaý kórsetilýi qajet dep sanaidy.
Memleket basshysy Armeniiany Qazaqstannyń Ońtústik Kavkaz aimaǵyndaǵy senimdi seriktesi retinde atady.
Qasym-Jomart Toqaevtyń aitýynsha, búginde qazaq-armian qarym-qatynasy kóptegen baǵyt boiynsha josparǵa sai damyp keledi. Buǵan turaqty saiasi dialog, saýda-ekonomikalyq jáne mádeni-gýmanitarlyq bailanystar yqpal etip otyr. Alen Simonian qonaqjailyq tanytqany úshin Memleket basshysyna jáne Qazaqstan halqyna shynaiy yqylasyn jetkizdi. Ol ekijaqty dialogtyń basty tetikteriniń biri retinde parlamentaralyq yqpaldastyqty nyǵaitý men senimdi saiasi seriktestik ornatýdyń máni zor ekenine toqtaldy.
Sondai-aq Ulttyq jinalys tóraǵasy Armeniia Respýblikasynyń Qazaqstanmen ekonomikalyq bailanystardy jandandyrýǵa múddeli ekenin atap ótti. Onyń pikirinshe, ózara saýda-sattyq kólemin arttyrýǵa yqpal etetin naqty sharalardy qolǵa alý kerek.
Armian tarapy oraily sátti paidalana otyryp, Qazaqstannyń Armeniia men Ázerbaijan arasynda beibitshilik ornatýǵa kúsh salǵany úshin alǵys aitty.
Qasym-Jomart Toqaev pen Alen Simonian eki eldiń ál-aýqaty men órleýi jolynda qazaq-armian qarym-qatynasyn jan-jaqty nyǵaitýǵa beiil ekenin rastady.
