مەملەكەت باسشىسى ارمەنيا ۇلتتىق جينالىسىنىڭ ءتوراعاسى الەن سيمونياندى قابىلدادى، دەپ حابارلايدى Dalanews.kz.
قاسىم-جومارت توقايەۆ مارتەبەلى مەيمانعا ءىلتيپات ءبىلدىرىپ، ارمەنيا پارلامەنتى سپيكەرىنىڭ ساپارى ەكىجاقتى ىنتىماقتاستىقتى تەرەڭدەتۋ تۇرعىسىنان ماڭىزعا يە ەكەنىن ايتتى. پرەزيدەنت ءوزارا ىقپالداستىقتى ىلگەرىلەتۋگە زاڭ شىعارۋشى ورگاندار تاراپىنان جان-جاقتى قولداۋ كورسەتىلۋى قاجەت دەپ سانايدى.
مەملەكەت باسشىسى ارمەنيانى قازاقستاننىڭ وڭتۇستىك كاۆكاز ايماعىنداعى سەنىمدى سەرىكتەسى رەتىندە اتادى.
قاسىم-جومارت توقايەۆتىڭ ايتۋىنشا، بۇگىندە قازاق-ارميان قارىم-قاتىناسى كوپتەگەن باعىت بويىنشا جوسپارعا ساي دامىپ كەلەدى. بۇعان تۇراقتى ساياسي ديالوگ، ساۋدا-ەكونوميكالىق جانە مادەني-گۋمانيتارلىق بايلانىستار ىقپال ەتىپ وتىر. الەن سيمونيان قوناقجايلىق تانىتقانى ءۇشىن مەملەكەت باسشىسىنا جانە قازاقستان حالقىنا شىنايى ىقىلاسىن جەتكىزدى. ول ەكىجاقتى ديالوگتىڭ باستى تەتىكتەرىنىڭ ءبىرى رەتىندە پارلامەنتارالىق ىقپالداستىقتى نىعايتۋ مەن سەنىمدى ساياسي سەرىكتەستىك ورناتۋدىڭ ءمانى زور ەكەنىنە توقتالدى.
سونداي-اق ۇلتتىق جينالىس ءتوراعاسى ارمەنيا رەسپۋبليكاسىنىڭ قازاقستانمەن ەكونوميكالىق بايلانىستاردى جانداندىرۋعا مۇددەلى ەكەنىن اتاپ ءوتتى. ونىڭ پىكىرىنشە، ءوزارا ساۋدا-ساتتىق كولەمىن ارتتىرۋعا ىقپال ەتەتىن ناقتى شارالاردى قولعا الۋ كەرەك.
ارميان تاراپى ورايلى ءساتتى پايدالانا وتىرىپ، قازاقستاننىڭ ارمەنيا مەن ازەربايجان اراسىندا بەيبىتشىلىك ورناتۋعا كۇش سالعانى ءۇشىن العىس ايتتى.
قاسىم-جومارت توقايەۆ پەن الەن سيمونيان ەكى ەلدىڭ ءال-اۋقاتى مەن ورلەۋى جولىندا قازاق-ارميان قارىم-قاتىناسىن جان-جاقتى نىعايتۋعا بەيىل ەكەنىن راستادى.
