Tal-daraq otyrǵyzý bir bólek, al olardy jersindirip, jetildirý úlken jumysty qajet etetini belgili. Osy rette, qalanyń jasyl ekpesine jaýapty «Jasyl Arys» mekemesi aǵash kósheterin ósirýde tyń ádister paidalanýda. Atap aitqanda, mekeme qyzmetkerleri kúz mezgilinde qalada ósip turǵan aǵashtardyń uryqtaryn jinaidy, dánderdi suryptaidy. Sodan soń, qala aýmaǵynda arnaiy ashylǵan tuqymbaqqa egedi.
Nátijesinde Arystyń topyraǵy men klimatyna beiimdelgen aǵash uryqtarynan alynǵan kóshetter joǵary ósimdi kórsetýde. Máselen, biyl maýsym aiynyń ortasynda sebilgen dánnen óngen qaraǵashtardyń boiy qazir bir metrden asqan.
– Syrttan, iaǵni jyly jaqtan ákelingen kóshetter Arystyń klimatyna beiimdelýi qiyn. Sondyqtan ótken jyly jergilikti aǵashtardyń uryqtaryn ósirýdi qolǵa aldyq. Olar 100 paiyz ósimdi kórsetti. Qazirgi tańda qalalyq tuqymbaqta 80 myń kóshet ósip tur. Kóktemgi aǵash otyrǵyzý maýsymyna ózimizde ósirilgen jas kóshetter daiyn, – dedi «Jasyl Arys» KMM basshysy Gúlmira Basarova.
Ósirilip jatqan kóshetterdiń túrleri de ár alýan. Qarapaiym qaraǵashtan bólek, úieńki, shaǵan, bozarsha, qaramala (gledichiia), jide bar.
«Jasylarystyqtar» kelesi jyly qalada ósip-óngen alma, sary órik taǵy da basqa jemis aǵashtaryn da ósirýdi josparlap otyr.
Búgingi tańda, shahardyń ishki kóshelerinen bólek, kire beris kúre joldar: Arys-Shymkent, Arys-Shardara tas joly boiynda 3-4 qatardan turatyn aǵashtar otyrǵyzylyp, olardyń 85 paiyzy tamyr jaiyp tur. Barlyǵy tamshylatyp sýǵarý júiesine qosylyp, jasyl sharbaqtarmen qorshalǵan.
