Arysta jeke kásipker erekshe kútimdi balalarǵa qyzmet kórsetetin ortalyqty ashty

Dalanews 12 tam. 2022 07:08 307

Túrkistan oblysy, Arys qalasynda 50 orynǵa arnalǵan «Danis» korreksıalyq damytý ortalyǵy saltanatty túrde ashylyp, oǵan qala ákimi Gúljan Qurmanbekova men qala turǵyndary, múmkindigi shekteýli balalar jáne olardyń ata-analary qatysty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Munda tili men qulaǵynda múkisi bar nemese aqyl-oı damýynda aýytqýshylyq baıqalatyn balalar men jalpy damýy kesheýildegen, arnaıy mamandar kómegin qajet etetin balalardyń ósip, jetilýi úshin barynsha jaǵdaı jasalǵan.

– Ózderińiz bilesizder, 2022 jyldy Memleket basshysy Qasym-Jomart Toqaev «Balalar jyly» dep jarıalaǵany belgili. Osyǵan oraı búgin qalamyzda balalarǵa arnalǵan ortalyq ashylyp otyr. Bul ortalyq búldirshinderimizden bólek, ata-analarymyz úshin de mańyzdy ári óte qajet dep oılaımyn.

Qazirgi kezde qala boıynsha aýrý túrine baılanysty memlekettik saraptama ortalyǵynyń qorytyndysyna sáıkes, 18 jasqa tolmaǵan múmkindigi shekteýli 495 bala tirkelgen bolsa, onyń 230-ǵa jýyǵy ótken jyly qalamyzda ashylǵan «Teń qoǵam» áleýmettik ortalyǵynyń qyzmetin paıdalanyp keledi.


Ereksheligi bar ul-qyzdarymyzdy emdep-saýyqtyrý arqyly biz olardy óz qatarymyzǵa qosyp alamyz dep senemin, – degen qala ákimi qaladaǵy turmystyq-áleýmettik máselelerdiń oń sheshilip, ómir súrý sapasynyń artýyna ákimdikpen birlese otyryp, jumys júrgizip jatqan ortalyqtyń jetekshileri men mamandaryna alǵys bildirdi.

Aıta keteıik, balalar ortalyǵyn ashyp otyrǵan jergilikti jeke kásipker Gúlbahram Erimbetova Arys qalasyndaǵy ortalyq emhanada úzdiksiz 45 jyl epıdemılog bolyp istep, zeınetke shyqqan jan. Onyń aıtýynsha, qazirdiń ózinde bul ortalyqqa ul-qyzyn tárbıelep damytý úshin 31 ata-anadan ótinish túsken.

«Danis» korreksıalyq damytý ortalyǵyn ashý isin ótken jyldan beri qolǵa alǵan. Qazir munda 4 tárbıeshi men onyń 2 kómekshisi, 1 psıholog, 2 defektolog, medısına mamany men aspazshy, kúzetshi syndy jalpy sany 15 adamdy Arys qalalyq jumyspen qamtý jáne áleýmettik baǵdarlamalar bólimi arqyly jumyspen qamtyp otyr.


– Ortalyqqa keletin bala sanyna qaraı, qyzmetkerler sany da kóbeıetin bolady, – deıdi Gúlbahram Sadyqbekqyzy.

Jańa ortalyqta logoped, defektolog, psıholog, pedıatr, emdik dene shynyqtyrý mamany sıaqty arnaıy mamandandyrylǵan top ókilderi qyzmet kórsetedi. Bir qyzyǵy munda tárbıelenetin balalardyń oıynshyqtaryna deıin olardyń jan-jaqty damýyna yńǵaılastyrylǵan. Sanıtarlyq talapqa saı salynǵan as bólmesindegi as máziri men aýladaǵy oıyn alańdary, emdik-saýyqtyrý baǵytyndaǵy tanymdyq, tárbıe saǵattary balalardyń fızıologıalyq turǵyda ózin-ózi damytýmen qatar, bilim alýyna da zor múmkindikter beredi.

 

Usynylǵan
Sońǵy jańalyqtar