Munda tili men qulaǵynda múkisi bar nemese aqyl-oi damýynda aýytqýshylyq baiqalatyn balalar men jalpy damýy kesheýildegen, arnaiy mamandar kómegin qajet etetin balalardyń ósip, jetilýi úshin barynsha jaǵdai jasalǵan.
– Ózderińiz bilesizder, 2022 jyldy Memleket basshysy Qasym-Jomart Toqaev «Balalar jyly» dep jariialaǵany belgili. Osyǵan orai búgin qalamyzda balalarǵa arnalǵan ortalyq ashylyp otyr. Bul ortalyq búldirshinderimizden bólek, ata-analarymyz úshin de mańyzdy ári óte qajet dep oilaimyn.
Qazirgi kezde qala boiynsha aýrý túrine bailanysty memlekettik saraptama ortalyǵynyń qorytyndysyna sáikes, 18 jasqa tolmaǵan múmkindigi shekteýli 495 bala tirkelgen bolsa, onyń 230-ǵa jýyǵy ótken jyly qalamyzda ashylǵan «Teń qoǵam» áleýmettik ortalyǵynyń qyzmetin paidalanyp keledi.
Ereksheligi bar ul-qyzdarymyzdy emdep-saýyqtyrý arqyly biz olardy óz qatarymyzǵa qosyp alamyz dep senemin, – degen qala ákimi qaladaǵy turmystyq-áleýmettik máselelerdiń oń sheshilip, ómir súrý sapasynyń artýyna ákimdikpen birlese otyryp, jumys júrgizip jatqan ortalyqtyń jetekshileri men mamandaryna alǵys bildirdi.
«Danis» korrektsiialyq damytý ortalyǵyn ashý isin ótken jyldan beri qolǵa alǵan. Qazir munda 4 tárbieshi men onyń 2 kómekshisi, 1 psiholog, 2 defektolog, meditsina mamany men aspazshy, kúzetshi syndy jalpy sany 15 adamdy Arys qalalyq jumyspen qamtý jáne áleýmettik baǵdarlamalar bólimi arqyly jumyspen qamtyp otyr.
– Ortalyqqa keletin bala sanyna qarai, qyzmetkerler sany da kóbeietin bolady, – deidi Gúlbahram Sadyqbekqyzy.
Jańa ortalyqta logoped, defektolog, psiholog, pediatr, emdik dene shynyqtyrý mamany siiaqty arnaiy mamandandyrylǵan top ókilderi qyzmet kórsetedi. Bir qyzyǵy munda tárbielenetin balalardyń oiynshyqtaryna deiin olardyń jan-jaqty damýyna yńǵailastyrylǵan. Sanitarlyq talapqa sai salynǵan as bólmesindegi as máziri men aýladaǵy oiyn alańdary, emdik-saýyqtyrý baǵytyndaǵy tanymdyq, tárbie saǵattary balalardyń fiziologiialyq turǵyda ózin-ózi damytýmen qatar, bilim alýyna da zor múmkindikter beredi.
