مۇندا ءتىلى مەن قۇلاعىندا مۇكىسى بار نەمەسە اقىل-وي دامۋىندا اۋىتقۋشىلىق بايقالاتىن بالالار مەن جالپى دامۋى كەشەۋىلدەگەن، ارنايى ماماندار كومەگىن قاجەت ەتەتىن بالالاردىڭ ءوسىپ، جەتىلۋى ءۇشىن بارىنشا جاعداي جاسالعان.
– وزدەرىڭىز بىلەسىزدەر، 2022 جىلدى مەملەكەت باسشىسى قاسىم-جومارت توقايەۆ «بالالار جىلى» دەپ جاريالاعانى بەلگىلى. وسىعان وراي بۇگىن قالامىزدا بالالارعا ارنالعان ورتالىق اشىلىپ وتىر. بۇل ورتالىق بۇلدىرشىندەرىمىزدەن بولەك، اتا-انالارىمىز ءۇشىن دە ماڭىزدى ءارى وتە قاجەت دەپ ويلايمىن.
قازىرگى كەزدە قالا بويىنشا اۋرۋ تۇرىنە بايلانىستى مەملەكەتتىك ساراپتاما ورتالىعىنىڭ قورىتىندىسىنا سايكەس، 18 جاسقا تولماعان مۇمكىندىگى شەكتەۋلى 495 بالا تىركەلگەن بولسا، ونىڭ 230-عا جۋىعى وتكەن جىلى قالامىزدا اشىلعان «تەڭ قوعام» الەۋمەتتىك ورتالىعىنىڭ قىزمەتىن پايدالانىپ كەلەدى.
ەرەكشەلىگى بار ۇل-قىزدارىمىزدى ەمدەپ-ساۋىقتىرۋ ارقىلى ءبىز ولاردى ءوز قاتارىمىزعا قوسىپ الامىز دەپ سەنەمىن، – دەگەن قالا اكىمى قالاداعى تۇرمىستىق-الەۋمەتتىك ماسەلەلەردىڭ وڭ شەشىلىپ، ءومىر ءسۇرۋ ساپاسىنىڭ ارتۋىنا اكىمدىكپەن بىرلەسە وتىرىپ، جۇمىس جۇرگىزىپ جاتقان ورتالىقتىڭ جەتەكشىلەرى مەن ماماندارىنا العىس ءبىلدىردى.
ايتا كەتەيىك، بالالار ورتالىعىن اشىپ وتىرعان جەرگىلىكتى جەكە كاسىپكەر گۇلباحرام ەرىمبەتوۆا ارىس قالاسىنداعى ورتالىق ەمحانادا ۇزدىكسىز 45 جىل ەپيدەميلوگ بولىپ ىستەپ، زەينەتكە شىققان جان. ونىڭ ايتۋىنشا، ءقازىردىڭ وزىندە بۇل ورتالىققا ۇل-قىزىن تاربيەلەپ دامىتۋ ءۇشىن 31 اتا-انادان ءوتىنىش تۇسكەن.
«Danis» كوررەكسيالىق دامىتۋ ورتالىعىن اشۋ ءىسىن وتكەن جىلدان بەرى قولعا العان. ءقازىر مۇندا 4 تاربيەشى مەن ونىڭ 2 كومەكشىسى، 1 پسيحولوگ، 2 دەفەكتولوگ، مەديسينا مامانى مەن اسپازشى، كۇزەتشى سىندى جالپى سانى 15 ادامدى ارىس قالالىق جۇمىسپەن قامتۋ جانە الەۋمەتتىك باعدارلامالار ءبولىمى ارقىلى جۇمىسپەن قامتىپ وتىر.
– ورتالىققا كەلەتىن بالا سانىنا قاراي، قىزمەتكەرلەر سانى دا كوبەيەتىن بولادى، – دەيدى گۇلباحرام سادىقبەك قىزى.
جاڭا ورتالىقتا لوگوپەد، دەفەكتولوگ، پسيحولوگ، پەدياتر، ەمدىك دەنە شىنىقتىرۋ مامانى سياقتى ارنايى مامانداندىرىلعان توپ وكىلدەرى قىزمەت كورسەتەدى. ءبىر قىزىعى مۇندا تاربيەلەنەتىن بالالاردىڭ ويىنشىقتارىنا دەيىن ولاردىڭ جان-جاقتى دامۋىنا ىڭعايلاستىرىلعان. سانيتارلىق تالاپقا ساي سالىنعان اس بولمەسىندەگى اس ءمازىرى مەن اۋلاداعى ويىن الاڭدارى، ەمدىك-ساۋىقتىرۋ باعىتىنداعى تانىمدىق، تاربيە ساعاتتارى بالالاردىڭ فيزيولوگيالىق تۇرعىدا ءوزىن-وزى دامىتۋمەن قاتار، ءبىلىم الۋىنا دا زور مۇمكىندىكتەر بەرەدى.
