Qyzylorda oblysynyń ákimi Nurlybek Nálibaevtyń qatysýymen Aral aýdanynda «Ase Invest» turmysqa qajetti untaqtar óndiretin zaýyttyń ashylý rásimi ótti, dep habarlaidy Dalanews.kz
Oǵan Parlament Senaty men Májilisiniń depýtattary Naýryzbai Baiqadamov, Rýslan Rústemov, Murat Ábenov, Marhabat Jaiymbetov,Murat Ergeshbaev, ziialy qaýym ókilderi men aýdan turǵyndary qatysty. Aimaq basshysy jinalǵan jurtshylyqty jańa zaýyttyń ashylýymen quttyqtap, aimaqtyń kásipkerlik salasynyń jańashyldyqtaryna toqtaldy.
«Memleket basshysy Qasym-Jomart Kemeluly: «Men investitsiia jáne biznes salasyndaǵy ahýaldy jaqsartýǵa, kásipkerlik bastamalardy qoldaýǵa airyqsha nazar aýdaramyn. Kásipkerlerge qolaily jaǵdai jasaý úshin biznesti júrgizý máselesine qatysty zań qabyldadyq. Qazir memlekettik baqylaý júiesin retke keltirip jatyrmyz», – degen bolatyn. Kásipkerlikti qoldaýǵa 2022-2024 jyldary ártúrli kózderden 206 mlrd. teńge tartylyp, 16 myń 700 joba qarjylandyryldy. Onyń 40 mlrd. 931 mln teńgesi memlekettik baǵdarlama aiasynda qoldaý tapty. Búgin «Ase Invest» seriktestigi iske qosatyn zaýytta sharýashylyqqa qajetti untaqtar shyǵarylmaq. Jańa zaýyt qutty, jumystaryńyz sátti, tabysty bolǵai!», – dedi aimaq basshysy.
Rásimde Parlament Májilisiniń depýtattary Murat Ergeshbaev pen Murat Ábenov quttyqtaý sóz sóiledi. Sonymen qatar, jańashyl bastamaǵa uiytqy bolǵan kompaniia ókilderi oblys ákiminiń Alǵys hatymen marapattaldy.
Aita keteiik, zaýyt táýligine 22 tonna ónim óndiredi. Shyǵarylǵan ónimniń 50 paiyzy eksportqa baǵyttalmaq. Jobanyń ekinshi kezeńinde kásiporyn ylǵal mailyqtar óndirisin jolǵa qoiýdy josparlaǵan. Tseh jyl sońyna deiin iske qosylady. Jańa kásiporyn 30 adamdy turaqty jumyspen qamtamasyz etedi.
