Osy aptada ol jalǵyz aktsioner retinde «Joint Resources» aktsionerlik qoǵamyn Qazaqstan qor birjasynan alyp tastaýǵa sheshim shyǵardy. Holdingtiń delistingi ony jariia alańnan shyǵarady. Buǵan deiin Joint Resources-tiń birjada bolýy kompaniiany turaqty túrde qarjylyq eseptilik jariialaýǵa, aktivter qurylymyn ashýǵa, bailanysty taraptarmen operatsiialardy kórsetýge jáne ishki qarjylyq aǵyndardy ashyq kórsetýge májbúrlep kelgen edi.
«Timýr Qulybaevtyń sońǵy tórt jylda shikizattyq aktivterin qysqarta bastaǵanyn kórip otyrmyz. Ol «Shubarkól kómir» kompaniiasyn satyp, kómir naryǵynan ketti. Munai aktivi bolyp sanalatyn «Kaspii neft» kompaniiasyn satady degen qaýesetter júr. Logikaǵa sai, bul kompaniia biyl qojaiynyn aýystyratynyn sezip otyrmyn. Qazir «Joint Resources» holdingi qaǵaz júzinde paida kórsetip, qarjylyq eseptiligin jaqsartyp aldy. Osy majorly notada birjadan ketip qalý sátti qadam bolyp sanalady», - deidi DALA INSIDE derekkózi.
Osy aida «Joint Resources» aktsionerlik qoǵamy óziniń 2025 jylǵa arnalǵan qarjylyq eseptiligin jariialady. Holding aktivterdiń qaita eseptelýiniń arqasynda 12,75 milliard teńge taza paidaǵa shyǵyp otyr. 2024 jyly kompaniia 86 mlrd teńge shyǵyn kórsetken edi. Qazir holding aktivteri 428,6 mlrd teńgege deiin ósip, mindettemeleri 104 mlrd teńgege jetti.
Sonda 2025 jyly Joint Resources qarjylyq aktivterdi qaita baǵalaýdan 39,47 mlrd teńge kiris tanyp otyr. Tek qaita baǵalaýdyń ózi kompaniia nátijesin shamamen 71,8 mlrd teńgege jaqsartty. Joint Resources-tiń tabysy naqty óndiristik nemese operatsiialyq aqsha aǵynyna emes, aktivterdiń qaǵaz júzindegi baǵasynyń ósýine qatty táýeldi. Kompaniia balansynda birneshe iri qarjylyq aktiv bar. Eń bastysy - «Kaspii neft» aktsionerlik qoǵamy. Joint Resources tolyǵymen bul aktivtiń 100 paiyz úlesin baqylaidy. Onyń 2025 jylǵy baǵasy 133,78 mlrd teńge dep kórsetilgen. Bir jyl buryn «Kaspii neft» 89,37 mlrd teńgege baǵalanǵan edi. Iaǵni bir jylda onyń baǵasy 44,4 mlrd teńgege ósken.
Dál qazir Qulybaev «Kaspii neft» kompaniiasyn keminde 120 milliard teńgege sata alady. Eger satyp alýshy tabylyp, munai kásiporny satylsa, onda bólek holding ustap otyrýdyń qajeti qysqarmaq. Sebebi holding quramyndaǵy basqa kompaniialardyń ortaq quny áldeqaida tómen. Holding portfelindegi «Kristall Menedjment» AQ, «Premier Development Company» JShS, «Aqsai» JShS syndy qalǵan kompaniia úlesteriniń jalpy naryqtyq quny 50 milliard teńgeden aspaidy.
Sondyqtan Joint Resources delistingi úlken daiyndyqtyń bir bóligi ekeni anyq. Holding jariia keńistikten shyǵyp ketkennen keiin, ony qaita qurylymdaý, jabý, aktivterin satý operatsiialaryn Timýr Asqaruly aqparattyq jariia fonsyz, tynysh ótkize alady.
Jańa Qazaqstannyń biznes kartinasynda úlken ózgerister júrip jatyr. Osynyń barlyǵyn DALA INSIDE baqylap otyrmaq.
