Maýsym aiy óńirdegi kúnkórisi malǵa qaraǵan aǵaiynǵa aýyr soqqan. Bir ǵana ótken aidyń ózinde 500-den asa iri qara aram ólgen. Tórt túliktiń jappai qyrylýyna biylǵy aptap ystyq pen sonyń saldarynan týyndaǵan qýańshylyq sebep.
Aýdandaǵy jaiylym jer men shabyndyqtyń 90 paiyzy tutasymen kúnge kúiip ketse, maýsym men shilde aiyndaǵy shilińgir ystyqtyń kesirinen Syrdariia ózeniniń arnasy tarylǵan.
Aýdandyq ákimdik tótenshe jaǵdai jariialaýǵa qajetti qaǵaz-qujatty bir ai boiy ázirlepti. Ákimdik ókilderi ázir ǵana qujatty Ádilet ministriligine tapsyrǵan.
Aýdandaǵy ahýaldy kúni-túni qadaǵalap, saraptan ótkizetin arnaiy jumys toby qurylǵan. Budan bólek aýdanǵa qarasty aýyldarda jem-shóp jinaýǵa atsalysatyn eriktiler brigadasy jasaqtalyp jatyr.
Aýdan ákimi Serik Serimaǵanbetovtyń aitýynsha jem-shóp tasymalyna kelgende óńir basshylyǵy Aqtóbe oblysymen ýaǵdalasqan. Yrǵyz aýdanynyń sharýalary Aral aýdanyna arnap qoljetimdi baǵada jem-shóp jetkizip bermek, budan bólek shabyndyq jerlerin paidalanýǵa ruqsat etpek.
Búginde shóptiń shyǵymyna bailanysty aýyldyq okrýgter «qyzyl», «sary», «jasyl» aimaqtarǵa bólingen. Onyń ishinde 13-i «qyzyl», 6-y «sary», 4-i «jasyl» aimaqta tur.
Qysta shamamen 205 myń bas tórt túlik qolda baǵylady dep josparlanǵan. Oǵan 184 myń tonna shóp qajet. Búginge deiin aýdanǵa 2 myń 300 tonnasy ǵana jetkizildi. Aýdandaǵy shabyndyqtardan 36 myń tonnadai shóp daiyndalady. Qalǵan 146 myń tonnasyn syrttan tasymaldaý josparlanyp otyr.
"Qýańshylyqtyń zardabyn joiý úshin bir ǵana Aral aýdanyna shamamen 2 mlrd teńge qajet. "Qyzyl" aimaqqa engen 13 okrýgte sý shyǵýy múmkin 15 jerden burǵylaý jumysyn júrgizemiz. Shabyndyq jerdi ulǵaitý maqsatynda aryq qazyp, bitelgenin arshyp, kúni buryn qam jasaimyz. Budan bólek osynaý jumysty der mezgilinde atqaratyn tiisti tehnikanyń ýaqytynda jetkeni mańyzdy", – dedi aýdan basshysy.
Serimaǵanbetovtyń aitýynsha tótenshe jaǵdaidy dál búgin engizý Aýyl sharýashylyǵy ministri Saparhan Omarovtyń otstavkaǵa ketýimen bailanysty emes.
"Qazaqstan aýmaǵynda qýanshylyq saldarynan buryn-sońdy tótenshe jaǵdai engizilgen emes. Osy jolǵy TJ el tarihyndaǵy osyndai alǵashqy oqiǵa", – deidi ol.
Aita ketelik, sarapshylar Saparhan Omarovtan tótenshe jaǵdaidy erte bastan engizýdi suraǵan bolatyn.
Ministrdiń malshylar muńyna kóńil bólmegenin synǵa alǵan prezident Omarovty otstavkaǵa jibergen edi.
"Árine, qýańshylyq – tabiǵi qubylys, ony jaqsy túsinemin. Mundai qiyn jaǵdaida jaýapty ministrlik tez arada jedel jáne sheshimdi túrde áreket etýi kerek edi. Biraq ministrlik bul sharýany atqara almady. Sondyqtan osy salaǵa jaýapty adam – ministr Saparhan Omarov otstavkaǵa ketýi kerek», – dedi Toqaev Úkimet jiynyndaǵy sózinde.
Arada bir saǵat óter-ótpes Aqorda baspasóz qyzmeti Toqaevtyń jarlyǵymen aýyl sharýashylyǵy ministri Saparhan Omarov otstavkaǵa ketkeni jóninde resmi aqparat taratty. Omarov ministr laýazymyna 2019 jylǵy aqpan aiynda taǵaiyndalǵan edi.
