ماۋسىم ايى وڭىردەگى كۇنكورىسى مالعا قاراعان اعايىنعا اۋىر سوققان. ءبىر عانا وتكەن ايدىڭ وزىندە 500-دەن اسا ءىرى قارا ارام ولگەن. ءتورت تۇلىكتىڭ جاپپاي قىرىلۋىنا بيىلعى اپتاپ ىستىق پەن سونىڭ سالدارىنان تۋىنداعان قۋاڭشىلىق سەبەپ.
اۋدانداعى جايىلىم جەر مەن شابىندىقتىڭ 90 پايىزى تۇتاسىمەن كۇنگە كۇيىپ كەتسە، ماۋسىم مەن شىلدە ايىنداعى شىلىڭگىر ىستىقتىڭ كەسىرىنەن سىرداريا وزەنىنىڭ ارناسى تارىلعان.
اۋداندىق اكىمدىك توتەنشە جاعداي جاريالاۋعا قاجەتتى قاعاز-قۇجاتتى ءبىر اي بويى ازىرلەپتى. اكىمدىك وكىلدەرى ءازىر عانا قۇجاتتى ادىلەت مينيسترىلىگىنە تاپسىرعان.
اۋدانداعى احۋالدى كۇنى-تۇنى قاداعالاپ، ساراپتان وتكىزەتىن ارنايى جۇمىس توبى قۇرىلعان. بۇدان بولەك اۋدانعا قاراستى اۋىلداردا جەم-شوپ جيناۋعا اتسالىساتىن ەرىكتىلەر بريگاداسى جاساقتالىپ جاتىر.
اۋدان اكىمى سەرىك سەرىماعانبەتوۆتىڭ ايتۋىنشا جەم-شوپ تاسىمالىنا كەلگەندە ءوڭىر باسشىلىعى اقتوبە وبلىسىمەن ۋاعدالاسقان. ىرعىز اۋدانىنىڭ شارۋالارى ارال اۋدانىنا ارناپ قولجەتىمدى باعادا جەم-شوپ جەتكىزىپ بەرمەك، بۇدان بولەك شابىندىق جەرلەرىن پايدالانۋعا رۇقسات ەتپەك.
بۇگىندە ءشوپتىڭ شىعىمىنا بايلانىستى اۋىلدىق وكرۋگتەر «قىزىل»، «سارى»، «جاسىل» ايماقتارعا بولىنگەن. ونىڭ ىشىندە 13ء-ى «قىزىل»، 6-ى «سارى»، 4ء-ى «جاسىل» ايماقتا تۇر.
قىستا شامامەن 205 مىڭ باس ءتورت تۇلىك قولدا باعىلادى دەپ جوسپارلانعان. وعان 184 مىڭ توننا ءشوپ قاجەت. بۇگىنگە دەيىن اۋدانعا 2 مىڭ 300 تونناسى عانا جەتكىزىلدى. اۋدانداعى شابىندىقتاردان 36 مىڭ تونناداي ءشوپ دايىندالادى. قالعان 146 مىڭ تونناسىن سىرتتان تاسىمالداۋ جوسپارلانىپ وتىر.
"قۋاڭشىلىقتىڭ زاردابىن جويۋ ءۇشىن ءبىر عانا ارال اۋدانىنا شامامەن 2 ملرد تەڭگە قاجەت. "قىزىل" ايماققا ەنگەن 13 وكرۋگتە سۋ شىعۋى مۇمكىن 15 جەردەن بۇرعىلاۋ جۇمىسىن جۇرگىزەمىز. شابىندىق جەردى ۇلعايتۋ ماقساتىندا ارىق قازىپ، بىتەلگەنىن ارشىپ، كۇنى بۇرىن قام جاسايمىز. بۇدان بولەك وسىناۋ جۇمىستى دەر مەزگىلىندە اتقاراتىن ءتيىستى تەحنيكانىڭ ۋاقىتىندا جەتكەنى ماڭىزدى"، – دەدى اۋدان باسشىسى.
سەرىماعانبەتوۆتىڭ ايتۋىنشا توتەنشە جاعدايدى ءدال بۇگىن ەنگىزۋ اۋىل شارۋاشىلىعى ءمينيسترى ساپارحان وماروۆتىڭ وتستاۆكاعا كەتۋىمەن بايلانىستى ەمەس.
"قازاقستان اۋماعىندا قۋانشىلىق سالدارىنان بۇرىن-سوڭدى توتەنشە جاعداي ەنگىزىلگەن ەمەس. وسى جولعى تج ەل تاريحىنداعى وسىنداي العاشقى وقيعا"، – دەيدى ول.
ايتا كەتەلىك، ساراپشىلار ساپارحان وماروۆتان توتەنشە جاعدايدى ەرتە باستان ەنگىزۋدى سۇراعان بولاتىن.
ءمينيستردىڭ مالشىلار مۇڭىنا كوڭىل بولمەگەنىن سىنعا العان پرەزيدەنت وماروۆتى وتستاۆكاعا جىبەرگەن ەدى.
"ارينە، قۋاڭشىلىق – تابيعي قۇبىلىس، ونى جاقسى تۇسىنەمىن. مۇنداي قيىن جاعدايدا جاۋاپتى مينيسترلىك تەز ارادا جەدەل جانە شەشىمدى تۇردە ارەكەت ەتۋى كەرەك ەدى. ءبىراق مينيسترلىك بۇل شارۋانى اتقارا المادى. سوندىقتان وسى سالاعا جاۋاپتى ادام – مينيستر ساپارحان وماروۆ وتستاۆكاعا كەتۋى كەرەك»، – دەدى توقايەۆ ۇكىمەت جيىنىنداعى سوزىندە.
ارادا ءبىر ساعات وتەر-وتپەس اقوردا باسپا ءسوز قىزمەتى توقايەۆتىڭ جارلىعىمەن اۋىل شارۋاشىلىعى ءمينيسترى ساپارحان وماروۆ وتستاۆكاعا كەتكەنى جونىندە رەسمي اقپارات تاراتتى. وماروۆ مينيستر لاۋازىمىنا 2019 جىلعى اقپان ايىندا تاعايىندالعان ەدى.
