Aral aýdanynda Kókaral bógeti qaita qalpyna keltirilip jatyr. QR Sý resýrstary jáne irrigatsiia ministri Nurjan Nurjigitov pen Qyzylorda oblysy ákiminiń orynbasary Bahyt Jahanov bógettiń qalpyna keltirý jumystarymen tanysty,- dep habarlaidy Dalanews.kz
Memleket basshysynyń 2019 jylǵy 14 mamyrdaǵy aimaqqa jumys saparynda Úkimet pen oblys ákimdigine "Kókaral" bógetin qalpyna keltirýde shuǵyl sharalar qabyldaý tapsyrylǵan bolatyn.
Osy tapsyrma boiynsha «Kókaral bógetin saqtap qalý jáne Syrdariia ózeniniń atyraýyn qalpyna keltirý» jobasynyń joba-smetalyq qujattamasy ázirlenip, memlekettik saraptamadan oń qorytyndy alyndy.
Jobanyń jalpy quny – 4,5 mlrd teńge. Tapsyrys berýshi – QR Sý resýrstary jáne irrigatsiia ministrligi. Jobanyń merdigeri – «Qazsýshar» RMK Qyzylorda filialy.
Jobany iske asyrý merzimi 2022-2026 jyldar aralyǵyn qamtidy. Osy kezeńde jumys kezeń-kezeńimen qarjylandyrylyp keledi.
Joba sheńberinde zaqymdalǵan bóget qalpyna keltirilip, "Qarashalań" kóli arqyly teńizge eki arna jáne "Tushy" kóli arqyly bir arna qazý josparlanǵan. Bul Kishi Aral teńiziniń ońtústik bóliginde turaqty sý ainalymyn qalyptastyrýǵa múmkindik beredi.
Atalǵan iri ekologiialyq joba Aral óńiriniń tabiǵi tepe-teńdigin qalpyna keltirýge, sý resýrstaryn tiimdi paidalanýǵa jáne jergilikti halyqtyń turmys sapasyn jaqsartýǵa baǵyttalǵan.
