Aqtóbede 45 jastaǵy turǵyny kabel qazamyn dep qalanyń birneshe shaǵynaýdany birneshe saǵat boiy sýsyz qaldy, dep habarlaidy Dalanews.kz.
Politsiia departamentiniń málimetinshe, er adam jer qazý jumystary úshin ekskavator jaldap, Aviaqalashyq aýmaǵyndaǵy sý munarasyn elektrmen qamtamasyz etetin jelini abaisyzda zaqymdaǵan.
Oqiǵa saldarynan Aviaqalashyq, GMZ, Dýman, Kókjide, sondai-aq 11 jáne 12-shaǵynaýdandarda sý berý derlik jarty táýlikke toqtatyldy. Kommýnaldyq qyzmetter apattyń saldaryn jedel túrde joidy.
Qazirgi ýaqytta keltirilgen zalal kólemi anyqtalýda. Múlikti abaisyzda búldirý deregi boiynsha sotqa deiingi tergeý bastaldy.
