Keiingi jyldary Vetnam qazaqstandyqtar arasynda eń tanymal baǵyttardyń birine ainaldy. Biraq bul elge saiahattap barý bir bólek te, turaqtap qalyp, kásip ashý - múldem bólek áńgime.
Dalanews.kz erekshe keiipkerlerdi tapty. Bul joly Vetnamda meiramhana ashqan qazaqstandyq erli-zaiyptymen tildestik.
Aqtóbelik Arman men Ainur Danang qalasyndaǵy jalǵyz Ortalyq Aziia meiramhanasyn ashqan. Ataýy da erekshe, meiramhana "Toi" dep atalady.
Qazaqstandyq erli-zaiypty Vetnamǵa kóshkenge deiin Tailandta alty ai turǵan. Sonyń ishinde Pattaiia men Phýkette bolǵan.
"Bul jaq bizge asa unamady: jyldyń qai mezgili bolsa da qatty ystyq, al mentaliteti bizge jat boldy. Vizalarymyzdyń merzimi bitken soń, ári qarai qaida baratynymyzdy izdei bastadym, sóitip TikTok-tan kezdeisoq Danang týraly videoǵa tap boldym. Kóreiik dep uiǵardyq. Alǵashqy aptada ne isterimizdi bilmedik, biraq jańbyr basylyp, jalǵa baik alǵanda, qala múlde basqa qyrynan ashylǵandai boldy, sóitip bul qalaǵa ǵashyq boldyq", - deidi ol.
32 jastaǵy Armannyń aitýynsha, Vetnamda, sonyń ishinde Danangta turyp jatqanyna bir jyldan asa ýaqyt bolǵan.
Qazaqstandyqtyń sózinshe, meiramhana ashý ideiasy kenet paida bolǵan. Bári osy elge saparlap kelýden bastalǵan.
"Áielim ekeýmizge Danang qatty unady, Aqtóbege oralǵannan keiin qaita oralǵymyz keletinin únemi oilap júrdik. Birde sóilesip otyryp: "Tike reis ashsa ǵoi!" dep oiladyq. Bir-eki aptadan keiin jańalyqtardan Danang qalasyna tikelei reister ashylǵanyn habarlady. Osy jańalyqtan keiin kóshý týraly naqty sheshim qabyldadyq", - deidi ol.
Arman burynnan tamaq daiyndaýdy unatady eken, biraq munymen tek hobbii retinde ainalysqan. Bir qyzyǵy, onyń eki mamandyǵy da múldem basqa salaǵa bailanysty.
"Eki joǵary bilimim bar: biri tehnikalyq, ekinshisi meditsinalyq. Sondyqtan buǵan deiin bul salamen bailanysym bolǵan joq", - deidi ol.
Ol aqpannyń basynda Danangqa kelip, tikelei reister ashylǵanǵa deiin meiramhanany iske qosý úshin jumysty bastap ketken.
Meiramhana iesi onyń ereksheligin de áńgimelep berdi.
"Tolyǵymen qazaq meiramhanasy dep aita almaimyz, bizdiń mázirimizde Ortalyq Aziianyń basqa taǵamdary da bar. Meniń oiymsha, bizdiń mekemeniń basty ereksheligi - tamaqty ózim ázirleitinim. Zalda vetnamdyq qyzmetkerler jumys isteidi. Qazirgi tańda komandamyzda bes adam bar. Biz jańa qyzmetkerler izdep jatyrmyz", - deidi ol.
Armannyń sózinshe, keide úlgermei qalatyn sátteri de bolady, sebebi osynsha adam keledi dep kútpegen.
"Keide tapsyrysty ýaqytynda berip úlgere bermeimiz, qonaqtardyń mundai legin kútken joqpyz. Turaqty jumys isteitin qyzmetkerlerdi tabý óte qiyn. Biraq meniń oiymsha, ár nárseniń óz ýaqyty bar, kún saiyn tájiribe jinaqtap jatyrmyz", - dedi ol.
Meiramhananyń ishi de ulttyq stilde bezendirilgen.
Arman vetnamdyqtardy qazaqtyń ulttyq taǵamdarymen tanystyryp júrgenin de aitty.
"Vetnamdyqtardy bizdiń shokolad, qurt, qazy, baýyrsaq, manty, laǵmanmen tanystyrdym. Olarǵa qatty unaǵany - baýyrsaq pen manty. Biraq jergilikti turǵyndar qurt pen qazyny onsha unatpady, olar úshin bul taǵamdar tym ashy eken", - dedi ol.
Ol shetelde qazaqtyń tól ereksheligin, ulttyq taǵamdardyń dámin saqtaýǵa tyrysatynyn jetkizdi.
"Taǵamdarymyzdyń ereksheligin saqtaýǵa tyrysamyz: dámdeýishterdiń barlyǵyn Qazaqstannan ákelemin, sebebi dámi dál Qazaqstandaǵydai bolsa eken deimin", - dedi ol.
Arman meiramhanadaǵy eń tanymal taǵamdardy da atady.
"Bizdiń meiramhanadaǵy eń tanymal taǵamdar, árine, siyr etinen jasalǵan manty jáne laǵman", - deidi iesi.
Meiramhana iesinen qonaqtardan qandai erekshe alǵys alǵandaryn da surap kórdik. Onyń sózinshe, úiinen jyraq júrgende úiindegidei dámdi sezine alǵanyna riza bolatyndar kóp.
"Bul ári qarai jalǵastyrýǵa jáne damýǵa shabyttandyra túsedi", - dep túiindedi áńgimesin ol.
