Aqtóbe oblysynda ulttyq mal sharýashylyǵyn damytýǵa baǵyttalǵan iri joba júzege asyrylyp jatyr. Munda «Qazaq jylqy sharýashylyǵy jáne jemshóp óndirisi» ǵylymi-zertteý institýtynyń ǵimaratynyń irgetasy qalanyp, qurylys jumystary bastaldy, dep habarlaidy Dalanews.kz.
Bul tarihi sátke Qazaq SSR-iniń aýyl sharýashylyǵy ǵylymdarynyń kandidaty, Muǵaljar jáne Kóshim jylqy tuqymdarynyń avtory, jylqy sharýashylyǵynyń abyzy – Serikbai Rzabaev arnaiy baryp, jańa ortalyqtyń tabysty bolýyna bata berip, izgi tilegin jetkizdi.
«Qazaq jylqy sharýashylyǵy jáne jem-shóp óndirisi» ǵylymi-zertteý institýtynyń Basqarma tóraǵasy Álibek Bazarǵalievtiń aitýynsha, qurylys jumystary 2026 jyldyń ekinshi toqsanynda aiaqtalmaq.
«Qazaq jylqy sharýashylyǵy ǵylymi-zertteý institýty ótken jyly Memleket basshysynyń tapsyrmasy aiasynda alǵashqy aýyl sharýashylyǵy forýmynda ashyldy. Biyl, bir jylǵa jetpei, burynǵy tájiribe stantsiiasy ǵylymi-zertteý baǵytyna aýystyryldy. Qazirgi ýaqytta jańa ǵimarattyń qurylys jumystary júrgizilýde. Jańa nysan quramynda bes zerthana bolady. Bul zerthanalarda asyltuqymdy jylqylardy jan-jaqty zertteý josparlanyp otyr. Institýttyń basty maqsaty – jylqy etin jáne qymyzdy shetel naryǵyna eksporttaý, sondai-aq ulttyq sport túrlerin damytý arqyly sport baǵytyndaǵy jylqy sharýashylyǵyn ilgeriletý. Sonymen qatar, otandyq shabandozdardyń halyqaralyq deńgeidegi jarystarǵa qatysýyna jaǵdai jasaý kózdelýde», – dedi Álibek Bazarǵaliev.
Institýttyń jobalyq syzbasyna sáikes, keshen aýmaǵynda manej, at qora, veterinariialyq pýnkt, zerthanalar men at jarys joly bar.
Atalǵan institýttyń qurylys jumystary 2026 jyldyń mamyr aiynda aiaqtalyp, tolyq iske qosylady dep kútilýde. Joba iske asqan jaǵdaida, Aqtóbe óńiri elimizdegi jylqy sharýashylyǵy men qymyz óndirisiniń basty ǵylymi ortalyǵyna ainalmaq.
