Aqtóbe qalasynyń 35 jastaǵy K. esimdi turǵyny «ZHULDYZ BUSINESS INTELLIGENCE COMMUNITY» atty biznes-qoǵamdastyq quryp, áleýmettik jelilerde dál osyndai ataýmen paraqsha júrgizgen. Ol bul jobany kásipkerlerge arnalǵan klýb retinde tanystyrǵan, dep habarlaidy Dalanews.kz.
Alaida áieldiń tiisti bilimi de, qarjylyq qyzmetpen ainalysýǵa arnalǵan resmi tirkeýi de, litsenziiasy da bolmaǵan, dep jazady Halyqstan.
Soǵan qaramastan, ol tanymal jelilik tulǵalar men media keńistiktegi mýltimillionerlerdi spiker retinde shaqyryp, biznes-forýmdar uiymdastyrýǵa kirisken.
Dáristerdi tyńdap, tabysqa jetýdi qalaityndarǵa 30 myń, 60 myń jáne 150 myń teńgege bilet usynylǵan.
Qonaqtardy qarsy alý jáne is-sharalardy ótkizý úshin qarajat qajet bolǵan. Olardyń qatarynda biznes-praktik, mýltimillioner Saidmýrod Davlatov ta bolǵan. Osy shyǵyndardy jabý úshin K. tanystarynan aqsha alyp, ony joǵary paiyzben qaitarýǵa ýáde bergen.
Alaida treningterdi uiymdastyrýǵa qarjy salǵan «investorlar» ýáde etilgen tabysty ala almaǵan. Biraz ýaqyttan keiin olar K.-ǵa qatysty is boiynsha sotta kýálik bergen.
Is materialdarynda jalpy 14 alaiaqtyq epizody tirkelgen.
Sottalýshy óz kinásin moiyndamaǵan. Ol jábirlenýshilerdi aldamaǵanyn, olardyń barlyǵy ózimen seriktes bolǵanyn jáne birlesken qyzmet týraly kelisimsharttar jasalǵanyn málimdegen.
Onyń aitýynsha, bizneste árdaiym táýekel bar jáne seriktesteri bul týraly bilgen. Keibir forýmdar sátsiz ótkendikten, qaryzǵa batqanyn aitqan. Qarjylyq qiyndyqtan shyǵý úshin jańa forýmdar uiymdastyrýdy jalǵastyrǵanyn jetkizgen.
Alaida qylmystyq sot K.-ny alaiaqtyq jasaǵany úshin kináli dep tanyp, ony 4 jyl 8 aiǵa bas bostandyǵynan aiyrý jazasyna kesken.
«Qazaqstan Respýblikasy Konstitýtsiiasynyń otyz jyldyǵyna bailanysty amnistiia týraly» zańǵa sáikes, oǵan taǵaiyndalǵan jaza 3 jyl 1 ai 10 kúnge deiin qysqartyldy.
Sot úkimine sáikes, áiel jazasyn balalary 14 jasqa tolǵannan keiin óteidi.
Sondai-aq ol jábirlenýshilerge shamamen 38 million teńgeni qaitarýǵa mindetteldi.
