Prezident hatty sol boida ashyp, 10 balaly otbasynan shyqqan oqýshynyń ata-anasyna baspana beriletinin aitty. «Aǵań kómektesedi» dep úi suraǵan oqýshynyń hatyn prezident Aqtóbe oblysynyń ákimi Berdibek Saparbaevtyń qolyna ustatqanyna kópshilik kýá.
Tórt aidyń ishinde baspanaly bolyp úlgergen bolar dep kópbalaly otbasyn izdedik. Qaladan tappaǵan soń Aqtóbeden 220 shaqyrym qashyqtyqtaǵy Qarabutaq aýylynda turatyn ata-anasyn izdep bardyq.
– Baspanaly bolmaq túgili, qara basymyz qaiǵy bolyp otyr. Prezident ketken boidan balamdy direktor kabinetine bir apta súiregen. Elbasy eki sóilemeitin adam edi... Álde prezident sóziniń jerde qalyp turǵany ma, bilmeimin. Nazarbaev mektebindegi internatqa balamdy biyldan bastap kirgizbei jatyr. Olar «Qalada tirkeýde ekensińder, internatqa jatqyza almaimyz» dep otyr. Endi balam páter jaldap turatyn aǵasynyń úiinen qatynaidy. Sabaǵy nasharlap ketetin boldy, – deidi alańdaǵan anasy Bibijamal Jumaǵulova.
– Oǵan prezidentke hat jaz dep aitqan joqpyz. Balam negizi kóp sóilemeidi. Prezidentke hat jazý qalai oiyna kelip júrgenin bilmeimin. Sheshesiniń balalardy shubyrtyp, ákimshilikten úi surap, salpaqtap júrgenin kóredi. Úide eshkim jumys istemegen soń qalada balalar turatyn páterdiń aqshasyn tóleitin kezde úlken aiqai bolady. Onyń hat jazǵanyn, Nazarbaevtyń úi beremin degenin internetten oqydyq. Mektepte úlken aiqai bolǵanyn da keiin estidik. Ony da muǵalimderdiń ózi habarlasyp aitty. «Balaǵa shamaly sóilep edik, keshirersizder» dep habarlasty. Olardyń internattan shyǵaramyn degenderi qiyn bolyp tur. Qalada úiim bolsa balamdy internatqa jatqyzbaimyn ǵoi, – deidi ákesi Jańabek Jumaǵulov.
Nazarbaev atyndaǵy ziiatkerlik mektepte Arman 7 synyptan beri oqyp keledi.
– Aýyl úshin balamnyń Nazarbaev mektebinde oqyp jatqany maqtanysh emes pe? Ol jaqqa ózi eńbegimen tústi. «Áke sol mektepke aparshy» degen soń baǵyn synasyn dep aparǵanymda ótip ketti. Balalardyń bárin toǵyz bitirtip, kolledjge oqýǵa jiberip jatyrmyn. Ómir súrý kerek. Úide eshkim jumys istemeidi. Aýylda jumys joq. Sheshemniń zeinetaqysy men balanyń járdemaqysyna qarap otyrmyz. Úlken qyzym kolledj bitirip, qalada jumys istep jatyr. Odan keiingisi de biyl bitirgenimen, jumys taba almai júr. 9 -shy klass bitirgen taǵy bir qyzymdy kolledjge jiberip jatyrmyn. Arman Nazarbaev mektebiniń internatynda jatatyn edi. Ana jaqtan shyǵarǵannan keiin ol da sol páterde turyp jatyr. Qazir altaýy bir páter jaldaidy, – deidi ákesi.
Otbasy úi alý úshin qalaǵa tirkeýde bolǵanymen, Qarabutaq aýylynda turyp jatyr. Kámelettik jasqa tolmaǵan alty bala bar.
– Prezidentpen kezdeserdiń aldynda balam aýylǵa kelgen edi. Muǵalimderdiń ózderi shaqyryp aldy. «Prezident kelgende turatyn 20 balanyń ishinde barsyń» dep habarlasqanda ulymdy taksige mingizip jiberdim. Barǵan soń «Papa, medaldarymdy salyp jiber» dedi. Prezident kelgende bul moinyna medaldaryn ilip turǵasyn shaqyrǵan shyǵar. Prezidenttiń ózi qasyna jaqyndap sóilesken. Onyń bárin balam aýylǵa kelgennen keiin surap bildik. Kórshiler «Úi alypsyńdar» dep qutty bolsyn aityp jatyr. Al balamnyń jaiy anaý. Ekeýmizdiń jumyssyz ekenimiz týraly anyqtamany da ala almai otyrmyz. Aýyl qalaǵa, qala aýyldaǵy ákimshilikke silteidi, – deidi altyn alqaly on balanyń anasy Bibijamal Jumaǵulova.
Prezident kómek suraǵan bala tileginiń oryndalyp, úidiń beriletinin aityp ketken otbasyǵa jergilikti ákimshilikten baspanany tek kezegimen ala altyndyǵy týraly habarlama kelgen.
