Aqtóbede oblystyq sottyń azamattyq ister jónindegi alqasynyń tóraiymy Raziia Ahmetovanyń uly Begarys Mahutov mas kúiinde kólik júrgizdi degen aiyptan tolyq aqtaldy. Ony byltyr qazan aiynda politsiia qyzmetkerleri toqtatyp, ákimshilik hattama toltyrǵan edi, dep habarlaidy Dalanews.kz Ratel.kz-ke siltep.
Oqiǵa 2023 jylǵy 1 qazanda tańǵy 5 shamasynda boldy. Patrýldik politsiia inspektory Kia Sportage kóligin toqtatyp, júrgizýshi — Begarys Mahutovqa QR ÁQBtK-niń 608-baby 1-bóligi («Mas kúiinde kólik quralyn basqarý») boiynsha ákimshilik hattama toltyrǵan.
Mahutov sotta ózin kinásiz dep tanyp, alkogoldi eki kún buryn, iaǵni 30 qyrkúiekte ishkenin aitqan. Onyń aitýynsha, inspektor Kakenov odan alkogol iisin sezip, meditsinalyq kýálandyrýdan ótýdi talap etken.
Meditsinalyq kýálandyrýdy júrgizgen dáriger M.K. Iskakova onyń tynysynan alkogol iisin tirkep, Alkotest 6820 qurylǵysymen ólsheý kezinde aldymen 1,43, keiin 1,60 promille kórsetkishin alǵan. Sonymen qatar, jedel mýlti-test arqyly jasalǵan biologiialyq zertteýde alkogol metabolitteri anyqtalǵan. Dáriger qorytyndysynda: «jeńil dárejeli mas kúii» dep kórsetilgen.
Begarys Mahutov bul qorytyndymen tanysýdan bas tartyp, qujattarǵa qol qoiýdan da úzildi-kesildi bas tartqan.
Keiin Mahutov basqa dáriger — A.D. Dosymovanyń qabyldaýynda qaita kýálandyrýdan ótti. Bul joly Alkotest qurylǵysy 0,67 promille kórsetti, al jedel testilerden alkogol metabolitteri tabylmady. Dosymova: «Alkogol qoldaný belgileri bar, alaida mas kúii anyqtalmady» degen qorytyndy shyǵardy.
Osy eki qarama-qaishy qorytyndyny saralaǵan mamandandyrylǵan ákimshilik sottyń sýdiasy Mira Kýpenova Mahutovtyń paidasyna sheshim shyǵardy.
«Sot otyrysynda anyqtalǵandai, Iskakova M.K. bergen qorytyndy zańsyz bolyp tabylady, sebebi klinikalyq derekter kýálandyrý nátijelerine sáikes kelmeidi. Osyǵan bailanysty Mahutovtyń mas kúiinde bolǵanyna kúmán týady», – delingen sot qaýlysynda.
Sýdia isti ákimshilik quqyqbuzýshylyq quramy joqtyǵyna bailanysty toqtatý týraly sheshim qabyldady. Alǵashynda kináli degen ustanymda bolǵan prokýratýra bul sheshimge shaǵym túsirgen joq.
Osy sotta osyǵan uqsas is qaraldy: biyl sáýir aiynda Hyundai kóligin mas kúide júrgizdi degen aiyppen Aqtóbe turǵyny ustaldy. Politsei ony da alkogol iisine bola toqtatqan. Dáriger V.N. Rashýpýkin onyń jaǵdaiyn «jeńil dárejeli mas kúii» dep baǵalady. Alaida júrgizýshi bul qorytyndymen kelispei, qaita kýálandyrýdan ótti. Ekinshi tekseris mas kúiin rastamady.
Azamat eki qorytyndyny jeke sot-meditsinalyq sarapshy Abylqasym Tlemisovke (IP «Med Expert») joldaǵan. Sarapshynyń qorytyndysy boiynsha, júrgizýshide mas kúii bolmaǵan.
Soǵan qaramastan, sýdia Aliia Bisenalina alǵashqy tekseristiń nátijesin ǵana negizge alyp, azamatty 7 jyl merzimge júrgizýshi kýáliginen aiyrdy. Eki túrli qorytyndy men sarapshynyń pikiriniń sheshimge esh áseri bolmady.
