اقتٶبەدە وبلىستىق سوتتىڭ ازاماتتىق ٸستەر جٶنٸندەگٸ القاسىنىڭ تٶرايىمى رازييا احمەتوۆانىڭ ۇلى بەگارىس ماحۇتوۆ ماس كٷيٸندە كٶلٸك جٷرگٸزدٸ دەگەن ايىپتان تولىق اقتالدى. ونى بىلتىر قازان ايىندا پوليتسييا قىزمەتكەرلەرٸ توقتاتىپ, ەكٸمشٸلٸك حاتتاما تولتىرعان ەدٸ, دەپ حابارلايدى Dalanews.kz Ratel.kz-كە سٸلتەپ.
وقيعا 2023 جىلعى 1 قازاندا تاڭعى 5 شاماسىندا بولدى. پاترۋلدٸك پوليتسييا ينسپەكتورى Kia Sportage كٶلٸگٸن توقتاتىپ, جٷرگٸزۋشٸ — بەگارىس ماحۇتوۆقا قر ەقبتك-نٸڭ 608-بابى 1-بٶلٸگٸ («ماس كٷيٸندە كٶلٸك قۇرالىن باسقارۋ») بويىنشا ەكٸمشٸلٸك حاتتاما تولتىرعان.
ماحۇتوۆ سوتتا ٶزٸن كٸنەسٸز دەپ تانىپ, الكوگولدٸ ەكٸ كٷن بۇرىن, ياعني 30 قىركٷيەكتە ٸشكەنٸن ايتقان. ونىڭ ايتۋىنشا, ينسپەكتور كاكەنوۆ ودان الكوگول يٸسٸن سەزٸپ, مەديتسينالىق كۋەلاندىرۋدان ٶتۋدٸ تالاپ ەتكەن.
مەديتسينالىق كۋەلاندىرۋدى جٷرگٸزگەن دەرٸگەر م.ك. يسكاكوۆا ونىڭ تىنىسىنان الكوگول يٸسٸن تٸركەپ, Alkotest 6820 قۇرىلعىسىمەن ٶلشەۋ كەزٸندە الدىمەن 1,43, كەيٸن 1,60 پروميللە كٶرسەتكٸشٸن العان. سونىمەن قاتار, جەدەل مۋلتي-تەست ارقىلى جاسالعان بيولوگييالىق زەرتتەۋدە الكوگول مەتابوليتتەرٸ انىقتالعان. دەرٸگەر قورىتىندىسىندا: «جەڭٸل دەرەجەلٸ ماس كٷيٸ» دەپ كٶرسەتٸلگەن.
بەگارىس ماحۇتوۆ بۇل قورىتىندىمەن تانىسۋدان باس تارتىپ, قۇجاتتارعا قول قويۋدان دا ٷزٸلدٸ-كەسٸلدٸ باس تارتقان.
كەيٸن ماحۇتوۆ باسقا دەرٸگەر — ا.د. دوسىموۆانىڭ قابىلداۋىندا قايتا كۋەلاندىرۋدان ٶتتٸ. بۇل جولى Alkotest قۇرىلعىسى 0,67 پروميللە كٶرسەتتٸ, ال جەدەل تەستٸلەردەن الكوگول مەتابوليتتەرٸ تابىلمادى. دوسىموۆا: «الكوگول قولدانۋ بەلگٸلەرٸ بار, الايدا ماس كٷيٸ انىقتالمادى» دەگەن قورىتىندى شىعاردى.
وسى ەكٸ قاراما-قايشى قورىتىندىنى سارالاعان مامانداندىرىلعان ەكٸمشٸلٸك سوتتىڭ سۋدياسى ميرا كۋپەنوۆا ماحۇتوۆتىڭ پايداسىنا شەشٸم شىعاردى.
«سوت وتىرىسىندا انىقتالعانداي, يسكاكوۆا م.ك. بەرگەن قورىتىندى زاڭسىز بولىپ تابىلادى, سەبەبٸ كلينيكالىق دەرەكتەر كۋەلاندىرۋ نەتيجەلەرٸنە سەيكەس كەلمەيدٸ. وسىعان بايلانىستى ماحۇتوۆتىڭ ماس كٷيٸندە بولعانىنا كٷمەن تۋادى», – دەلٸنگەن سوت قاۋلىسىندا.
سۋديا ٸستٸ ەكٸمشٸلٸك قۇقىقبۇزۋشىلىق قۇرامى جوقتىعىنا بايلانىستى توقتاتۋ تۋرالى شەشٸم قابىلدادى. العاشىندا كٸنەلٸ دەگەن ۇستانىمدا بولعان پروكۋراتۋرا بۇل شەشٸمگە شاعىم تٷسٸرگەن جوق.
وسى سوتتا وسىعان ۇقساس ٸس قارالدى: بيىل سەۋٸر ايىندا Hyundai كٶلٸگٸن ماس كٷيدە جٷرگٸزدٸ دەگەن ايىپپەن اقتٶبە تۇرعىنى ۇستالدى. پوليتسەي ونى دا الكوگول يٸسٸنە بولا توقتاتقان. دەرٸگەر ۆ.ن. راششۋپۋكين ونىڭ جاعدايىن «جەڭٸل دەرەجەلٸ ماس كٷيٸ» دەپ باعالادى. الايدا جٷرگٸزۋشٸ بۇل قورىتىندىمەن كەلٸسپەي, قايتا كۋەلاندىرۋدان ٶتتٸ. ەكٸنشٸ تەكسەرٸس ماس كٷيٸن راستامادى.
ازامات ەكٸ قورىتىندىنى جەكە سوت-مەديتسينالىق ساراپشى ابىلقاسىم تلەميسوۆكە (يپ «Med Expert») جولداعان. ساراپشىنىڭ قورىتىندىسى بويىنشا, جٷرگٸزۋشٸدە ماس كٷيٸ بولماعان.
سوعان قاراماستان, سۋديا الييا بيسەنالينا العاشقى تەكسەرٸستٸڭ نەتيجەسٸن عانا نەگٸزگە الىپ, ازاماتتى 7 جىل مەرزٸمگە جٷرگٸزۋشٸ كۋەلٸگٸنەن ايىردى. ەكٸ تٷرلٸ قورىتىندى مەن ساراپشىنىڭ پٸكٸرٸنٸڭ شەشٸمگە ەش ەسەرٸ بولمادى.
