14 naýryz – Kórisý kúnine orai Aqtóbe qalalyq mádeniet jáne tilderdi damytý bólimine qarasty Sazdy mádeniet úii men №83 jalpy bilim beretin orta mektebiniń uiymdastyrýymen «Naýryz – bereke bastaýy» atty merekelik kontserttik baǵdarlama uiymdastyryldy, dep habarlaidy Dalanews.kz.
Is-sharaǵa Aqtóbe qalasynyń ákimi Azamat Beket qatysyp, jinalǵan jurtshylyqty Kórisý kúnimen quttyqtap, Naýryz meiramynyń el birligi men tatýlyǵyn nyǵaitýdaǵy mańyzyna toqtaldy.
Shara barysynda ulttyq dástúrler dáriptelip, kiiz úi tigilip, altybaqan quryldy. Kelgen qonaqtarǵa ulttyq taǵam – Naýryz kóje usynyldy.
Sondai-aq shara aiasynda qazaq halqynyń ejelgi Kórisý dástúri keńinen nasihattalyp, turǵyndar bir-birimen kórisip, aqjarma tilekterin bildirdi.
Merekelik baǵdarlama ulttyq óner men salt-dástúrdi ulyqtaýǵa baǵyttalǵan kontserttik keshpen jalǵasty. Kontsert barysynda «Sazdy» mádeniet úiiniń ónerpazdary óner kórsetip, kórermenderge erekshe kóńil kúi syilady. Sonymen qatar «Aqmarjan» ájeler ansambli men «Úlgili» «Dombyra dastan» ansambli ulttyq án-kúiler oryndap, sahnalyq qoiylymdar usyndy.
Is-shara barysynda kelýshiler ulttyq oiyndardy tamashalap, qazaqtyń dástúrli qolóner buiymdarynyń kórmesin kórdi. Sondai-aq atalar keńesi men ájeler ónegesi dáriptelip, jas urpaqqa ulttyq qundylyqtardy nasihattaýdyń mańyzy keńinen aityldy.
Bul taǵylymy mol merekelik kezdesý qala turǵyndaryna kóterińki kóńil kúi syilap, ulttyq salt-dástúrdi ulyqtaýǵa baǵyttalǵan mazmundy sharalardyń biri boldy.
