14 ناۋرىز – كورىسۋ كۇنىنە وراي اقتوبە قالالىق مادەنيەت جانە تىلدەردى دامىتۋ بولىمىنە قاراستى سازدى مادەنيەت ءۇيى مەن №83 جالپى ءبىلىم بەرەتىن ورتا مەكتەبىنىڭ ۇيىمداستىرۋىمەن «ناۋرىز – بەرەكە باستاۋى» اتتى مەرەكەلىك كونسەرتتىك باعدارلاما ۇيىمداستىرىلدى، دەپ حابارلايدى Dalanews.kz.
ءىس-شاراعا اقتوبە قالاسىنىڭ اكىمى ازامات بەكەت قاتىسىپ، جينالعان جۇرتشىلىقتى كورىسۋ كۇنىمەن قۇتتىقتاپ، ناۋرىز مەيرامىنىڭ ەل بىرلىگى مەن تاتۋلىعىن نىعايتۋداعى ماڭىزىنا توقتالدى.
شارا بارىسىندا ۇلتتىق داستۇرلەر دارىپتەلىپ، كيىز ءۇي تىگىلىپ، التىباقان قۇرىلدى. كەلگەن قوناقتارعا ۇلتتىق تاعام – ناۋرىز كوجە ۇسىنىلدى.
سونداي-اق شارا اياسىندا قازاق حالقىنىڭ ەجەلگى كورىسۋ ءداستۇرى كەڭىنەن ناسيحاتتالىپ، تۇرعىندار بىر-بىرىمەن كورىسىپ، اقجارما تىلەكتەرىن ءبىلدىردى.
مەرەكەلىك باعدارلاما ۇلتتىق ونەر مەن ءسالت-داستۇردى ۇلىقتاۋعا باعىتتالعان كونسەرتتىك كەشپەن جالعاستى. كونسەرت بارىسىندا «سازدى» مادەنيەت ءۇيىنىڭ ونەرپازدارى ونەر كورسەتىپ، كورەرمەندەرگە ەرەكشە كوڭىل كۇي سىيلادى. سونىمەن قاتار «اقمارجان» اجەلەر ءانسامبلى مەن «ۇلگىلى» «دومبىرا داستان» ءانسامبلى ۇلتتىق ان-كۇيلەر ورىنداپ، ساحنالىق قويىلىمدار ۇسىندى.
ءىس-شارا بارىسىندا كەلۋشىلەر ۇلتتىق ويىنداردى تاماشالاپ، قازاقتىڭ ءداستۇرلى قولونەر بۇيىمدارىنىڭ كورمەسىن كوردى. سونداي-اق اتالار كەڭەسى مەن اجەلەر ونەگەسى دارىپتەلىپ، جاس ۇرپاققا ۇلتتىق قۇندىلىقتاردى ناسيحاتتاۋدىڭ ماڭىزى كەڭىنەن ايتىلدى.
بۇل تاعىلىمى مول مەرەكەلىك كەزدەسۋ قالا تۇرعىندارىنا كوتەرىڭكى كوڭىل كۇي سىيلاپ، ۇلتتىق ءسالت-داستۇردى ۇلىقتاۋعا باعىتتالعان مازمۇندى شارالاردىڭ ءبىرى بولدى.
