Aqtóbedegi bazarda ainaldyrǵan eki kún ishinde kiik etiniń tórt tonnasy ótip ketipti. Surap kelýshiler sany jeterlik. Kóbisi baǵasyna qyzyǵady. Siyr men jylqy etinen eki ese arzan, dep habarlaidy Dalanews.kz.
KTK telearnasynyń habarlaýynsha, aqbókenniń tórt aiaǵyn túgeldei bútin alsa, 30 teńgege shyǵady. Al kelesin 1800 teńgeden satyp tur.
"Qaltany kóteretin, kúndelikti qýyrmashqa, qýyrdaq qýyrýǵa paidaly. Sol úshin kelip turmyn. Buryn-sońdy kiik eti Aqtóbede bulai ashyq satylmaǵan. Tek 80-jyldardyń sońynda ǵana dúkenge shyǵarylǵan. Sondyqtan baǵasyna jurt qyzyqqanymen, ony kádege jaratý jaǵyn kóbisi bile bermeidi. Sorpaǵa tatymaidy", - deidi aqtóbelik Shárbat Sársenbaeva
Mamandar kiik eti densaýlyqqa paidaly dep otyr. Dieta ustap, ózin baptap qalǵan adamdar alsa bolady dep keńes beredi. Sebebi, eti maily emes, qunary joǵary. Al káýapqa jarai bermeidi.
"Keńes Odaǵy kezinde aldyq. Ol kezde kelisi bir som turatyn. Qazir de siyr etinen arzan satylyp jatyr. Sheber áiel bolsa, kiik etinen qýyrdaqtan bastap, sorpanyń túr-túrin, basqa mal etimen aralastyryp týrap, kotlet, taǵy basqa taǵam ázirleýge bolady. Buryn qinalǵan kezde aldyq qoi", - deidi taǵy bir jergilikti turǵyn Svetlana Ivanova.
Osydan eki jyl buryn Oraldan aýlanǵan aqbóken etin Aqtóbege ákelgende turǵyndar qyzyqqan. Biraq qujaty bolmai, sońy shýǵa ainalyp eti kádege jaramai qalyp edi. Biyl et ótkizý jaǵyn jolǵa qoiypty.
"Búkil qujaty Oraldan tekserilip bizge keledi. Bizge kelgennen keiin Aqtóbe mamandary qaitadan tekseredi. Sol ruqsat qaǵazymen bazarǵa, bizge, saýdaǵa kiredi. Halyq jaqsy alyp jatyr, unatyp jatyr. Úsh kúnnen beri suranysy jaqsy. Aqtóbege kórshiles Batys Qazaqstan men Qostanai oblystarynda aqbóken aýlaýǵa ruqsat berilgen. Etin arnaiy tsehtarǵa ótkizip, sol arqyly ǵana satylymǵa shyǵady", - deidi bazar ákimshisi Gúlnar Tileý.
Aita ketsek, 2025 jyly 17 maýsymda Qazaqstan Prezidenti Qasym-Jomart Toqaev kórshi eldegi aqbóken popýliatsiiasyn qalpyna keltirý maqsatynda Qytaidyń batys bóligine jiberý úshin Qytai úkimetine 1,5 myń aqbóken berý týraly sheshim qabyldaǵanyn málimdedi. Óz kezeginde QHR tóraǵasy Si Tszinpin Qasym-Jomart Toqaevqa bul úshin alǵys bildirdi, óitkeni Qytai aqbókender popýliatsiiasyn qalpyna keltirýdi mańyzdy másele dep sanaidy.
Buǵan deiin Aýylsharýashylyǵy ministri aqbóken etiniń bir kelisi 1600 teńge bolýy múmkin ekenin aitqan edi.
