Aqtóbe oblysynyń ákimi Ashat Shaharov Ortalyq kommýnikatsiialar qyzmetinde ótken baspasóz konferentsiiasynda óńirdiń áleýmettik salasyndaǵy aǵymdaǵy jobalar men damý perspektivalary týraly aitty, dep habarlaidy Dalanews.kz.
Ákimniń aitýynsha, óńirde halyqty sportqa tartý jáne salaýatty ómir saltyn qalyptastyrý baǵytynda aýqymdy jumystar júrgizilýde. Memleket basshysy Ulttyq quryltaidyń tórtinshi otyrysynda bergen tapsyrmalaryn oryndaý úshin mańyzdy bastamalar júzege asyrylyp jatyr.
Máselen, Aqtóbede «ALAN» jobasy aiasynda biýdjettik emes qarajat esebinen fýtbol alańy jańartyldy, al Hromtaý aýdanynda «FIFA ARENA» baǵdarlamasy boiynsha zamanaýi mini-fýtbol stadiony ashyldy.
«Sonymen qatar, múmkindigi shekteýli adamdarǵa arnalǵan biregei sport kesheniniń qurylysy aiaqtalýǵa jaqyn. Onda 25 sport túri boiynsha oqytý josparlanǵan. Nysan Qazaqstandaǵy inkliýzivtik standarttarǵa beiimdelgen alǵashqy keshenderdiń biri bolady jáne jyl sońyna deiin paidalanýǵa beriledi», – dedi oblys ákimi.
Fýtbol aqtóbelikterdiń ómirinde erekshe orynǵa ie. Bul sport túriniń joǵary tanymaldyǵyn eskere otyryp, oblys ortalyǵynda ÝEFA-nyń tórtinshi deńgei talaptaryna sai 35 myń oryndyq jańa stadionnyń qurylysy bastaldy. Ol «Aqtóbe» áleýmettik-iskerlik ortalyǵynyń aýmaǵynda salynýda. Janynda 5 myń oryndyq kópfýnktsionaldy sport kesheniniń jobasy júzege asyrylyp jatyr.
Ashat Shaharov mádeniet salasynyń da basty nazarda ekenin atap ótti.
Memleket basshysynyń tapsyrmasyna sáikes, Aqtóbede jańa zamanaýi drama teatrynyń qurylysy bastaldy. Jobaǵa oblystyq biýdjetten 2,8 mlrd teńge bólinip, qurylys jumystary júrgizilýde.
Ákimniń aitýynsha, basym baǵyttardyń biri – aýyl turǵyndaryn sapaly internetpen qamtamasyz etý.
«2025 jyly óńirdiń 12 aýyly internet jelisine qosyldy, jyl sońyna deiin taǵy úsh eldi mekende internet paida bolady», – dedi Ashat Shaharov.
Halqy 100 adamǵa deiingi shaǵyn aýyldar úshin OneWeb spýtniktik tehnologiiasy engizilýde. Búginde 19 aýyl qosylǵan, jyl sońyna deiin taǵy 5 aýyldy qamtý josparda.
Sonymen qatar «Qoljetimdi internet» ulttyq jobasy aiasynda oblystyń 9 aýdanynda 17 antenna-machta qurylǵysyn ornatý úshin oryndar anyqtaldy. Barlyq qajetti qujattar daiyndaldy.
