Aqtóbe oblysynda kólik qoljetimdiligin jaqsartý jáne halyqtyń ómir súrý sapasyn arttyrýǵa baǵyttalǵan infraqurylymdyq jobalar belsendi túrde júzege asyrylýda. Bul týraly oblys ákimi Ashat Shaharov Ortalyq kommýnikatsiialar qyzmetiniń alańynda ótken baspasóz konferentsiiasynda málimdedi, dep habarlaidy Dalanews.kz.
«Geografiialyq turǵydan tiimdi ornalasýyna bailanysty oblystyń tranzittik áleýeti joǵary. Sondyqtan joldardyń sapasy men kólik jelisin damytý árdaiym turǵyndar men bizdiń basty nazarymyzda», – dep atap ótti oblys ákimi.
2025 jyly avtojol salasyn damytýǵa 68 mlrd teńge baǵyttaldy. Jalpy, joldardy salý jáne jóndeý boiynsha 186 joba iske asyrylyp, 565 shaqyrym jol jabyny qalpyna keltirildi.
Jyl sońyna deiin jergilikti mańyzdaǵy avtomobil joldarynyń normativtik jaǵdaidaǵy úlesin 78%-dan 82%-ǵa deiin arttyrý josparlanýda.
Sondai-aq halyqaralyq «Samara–Shymkent» avtojolynyń «Aqtóbe–Ulǵaisyn» ýchaskesin rekonstrýktsiialaý jumystary bastaldy. Onyń jalpy uzyndyǵy – 262 shaqyrym. Atap aitqanda, biyl «Aqtóbe–Hromtaý» jolynyń 28 shaqyrym ýchaskesi jańardy, jańa kópir ótkeli salyndy. Nátijesinde 791–819 shaqyrym bóliginde tórt jolaqtyń ekeýi boiynsha qozǵalys ashyldy. Qalǵan 234 shaqyrymda qurylys-jóndeý jumystary jalǵasyp jatyr.
Budan bólek, Ortalyq–Batys kólik dálizi quramyndaǵy «Qandyaǵash – Embi – Shalqar – Yrǵyz» respýblikalyq trassasyn jóndeý jumystary júrgizilýde. 110 shaqyrym paidalanýǵa berildi.
«Qaýipsiz joldar – bul tek kólik júiesi ǵana emes, sonymen qatar ekonomikalyq ósýdiń, qozǵalys yńǵailylyǵy men turǵyndar qaýipsizdiginiń mańyzdy faktory», – dedi Ashat Shaharov.
