اقتوبە وبلىسىندا كولىك قولجەتىمدىلىگىن جاقسارتۋ جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان ينفراقۇرىلىمدىق جوبالار بەلسەندى تۇردە جۇزەگە اسىرىلۋدا. بۇل تۋرالى وبلىس اكىمى اسحات شاحاروۆ ورتالىق كوممۋنيكاسيالار قىزمەتىنىڭ الاڭىندا وتكەن باسپا ءسوز كونفەرەنسياسىندا مالىمدەدى، دەپ حابارلايدى Dalanews.kz.

«گەوگرافيالىق تۇرعىدان ءتيىمدى ورنالاسۋىنا بايلانىستى وبلىستىڭ ترانزيتتىك الەۋەتى جوعارى. سوندىقتان جولداردىڭ ساپاسى مەن كولىك جەلىسىن دامىتۋ ءاردايىم تۇرعىندار مەن ءبىزدىڭ باستى نازارىمىزدا»، – دەپ اتاپ ءوتتى وبلىس اكىمى.

2025 جىلى اۆتوجول سالاسىن دامىتۋعا 68 ملرد تەڭگە باعىتتالدى. جالپى، جولداردى سالۋ جانە جوندەۋ بويىنشا 186 جوبا ىسكە اسىرىلىپ، 565 شاقىرىم جول جابىنى قالپىنا كەلتىرىلدى.

جىل سوڭىنا دەيىن جەرگىلىكتى ماڭىزداعى اۆتوموبيل جولدارىنىڭ نورماتيۆتىك جاعدايداعى ۇلەسىن 78%-دان 82%-عا دەيىن ارتتىرۋ جوسپارلانۋدا.

سونداي-اق حالىقارالىق «سامارا–شىمكەنت» اۆتوجولىنىڭ «اقتوبە–ۇلعايسىن» ۋچاسكەسىن رەكونسترۋكسيالاۋ جۇمىستارى باستالدى. ونىڭ جالپى ۇزىندىعى – 262 شاقىرىم. اتاپ ايتقاندا، بيىل «اقتوبە–حرومتاۋ» جولىنىڭ 28 شاقىرىم ۋچاسكەسى جاڭاردى، جاڭا كوپىر وتكەلى سالىندى. ناتيجەسىندە 791–819 شاقىرىم بولىگىندە ءتورت جولاقتىڭ ەكەۋى بويىنشا قوزعالىس اشىلدى. قالعان 234 شاقىرىمدا قۇرىلىس-جوندەۋ جۇمىستارى جالعاسىپ جاتىر.

بۇدان بولەك، ورتالىق–باتىس كولىك ءدالىزى قۇرامىنداعى «قاندىاعاش – ەمبى – شالقار – ىرعىز» رەسپۋبليكالىق تراسساسىن جوندەۋ جۇمىستارى جۇرگىزىلۋدە. 110 شاقىرىم پايدالانۋعا بەرىلدى.

«ءقاۋىپسىز جولدار – بۇل تەك كولىك جۇيەسى عانا ەمەس، سونىمەن قاتار ەكونوميكالىق ءوسۋدىڭ، قوزعالىس ىڭعايلىلىعى مەن تۇرعىندار قاۋىپسىزدىگىنىڭ ماڭىزدى فاكتورى»، – دەدى اسحات شاحاروۆ.